– Får eg to-tre gode bilde i året, så er eg veldig fornøgd. Då må ein ha auga med seg, lyset må vere perfekt, og ein må vere på rett stad til rett tid.

Wilfred Wessel Berthelsen kjøpte det første kameraet sitt i 1986. I dag legg han sjela si i fotografi, og har reist verda rundt for å fange blinkskot av majestetiske dyr i storslåtte landskap.

For tolv år sidan hadde han ei mindre utstilling på Frekhaug. Fredag skal han ha si første store utstilling i London, og han har engasjert både ambassade, fleire kunstnarar og heile 30 forskjellige kunstgalleri.

Vart oppdaga av fotograf og kunstsamlar

Berthelsen er født og oppvaksen på Gaustad i Meland. I tillegg til å ha fleire prosjekt på gang, jobbar familiemannen i Nordsjøen.

I fleire år har han brukt mykje tid på å besøke nye land og kontinent, noko som mellom anna har resultert i fleire fotobøker.

Kunstfotografen skildrar bilda sine som minimalistiske. Motiva er hovudsakeleg dyr kombinert med landskap i svart-kvitt. Bak bilda ligg det også ein bodskap om å ta vare på planeten.

– I 2007 byrja eg å reise til Afrika, og før Covid-galskapen var eg tre veker på Island. Eg heldt på å gå på veggen då eg plutseleg ikkje kunne reise meir, så då jobba eg med eit prosjekt heime i Meland, fortel han.

Men det største prosjektet til Berthelsen er Exodus, som han no skal stille ut i London. På ti år har han reist tre gonger til Antarktis og fem gonger til Arktis der han har fotografert isbjørnar og pingvinar. På den første ekspedisjonen til Arktis møtte han fotografen og kunstsamlaren Susi Ma frå England.

– Eg viste litt av prosjektet til henne, og ho vart veldig imponert. Etter å ha halde eit føredrag for ho på båten, sa ho at «dette her må du berre stille ut».

Håpar på eit par hundre meter med kø

Berthelsen, som er tidlegare student av den anerkjende fotografen Morten Krogvold, fortel at det er mykje som føregår på kunstfronten i London for tida, og at det difor er stort for han å skulle vise fram verket sitt.

– Eg kjenner ikkje London, men eg har brukt alle kontaktane eg har, og Susi Ma har eit stort kontaktnett i byen og har invitert alle sine kontaktar innanfor kunst. Ambassaden har også invitert ein god del. I tillegg kjem halve familien min og nokre vener.

– Eg gler meg så jæklig. Eg drøymer om eit par hundre meter med kø på fredag, men eg har mareritt om at det berre kjem eit par, ler Berthelsen.

Han stiller ut ti store bilde der det største er over to meter. Også innramminga av bilda er nøye planlagt.

– No brukar eg eit londonbasert selskap som printar og rammar inn bilda mine. Det er snakk om museumskvalitet på glaset, du får ikkje betre innramming enn dette. Det kostar mykje, men til gjengjeld ser bilda fantastiske ut.

Han fortel at heile serien som han stiller ut allereie er selt til eit norsk selskap.

– Det blir litt stas å kunne setje ein raud prikk på alle bilda, seier han lattermildt.

Travel haust

Det blir ikkje mykje pause på kunstfotografen etter at han er ferdig med utstillinga i London. Allereie 1. desember skal han nemleg stille ut ytterlegare ti bilde frå Exodus-prosjektet i Grieghallen.

– Målet er å bli like god som dei beste. Og då må ein komme seg ut og jobbe.

Han håpar å også kunne lansere ei bok knytt til prosjektet når den tid kjem. Like etter gir han ut ein sjølvbiografi.

– Utstillinga i London blir stor, men utstillinga i Grieghallen blir svær, seier Berthelsen.