Stina Nes Sjursen (18) frå Frekhaug fekk denne veka vite at ho har blitt valt til å spele klarinett i Hans Majestet Konges Garde, musikktroppen eller 3. gardekompani.

– Då eg opna meldinga frå Forsvaret der det stod at eg kom inn i Musikktroppen blei eg heilt sjokkert og byrja å gråte, fortel Sjursen.

Då var ho på skulen, Knarvik VGS, og det tikka inn med gratulasjonar frå medelevar.

– Eg trur ikkje eg har vore så glad i livet mitt før, ler 18-åringen.

Hennar førstegongsteneste byrjar i september og varer i eit år.

Eit urealistisk mål

Kvart år blir 10-15 personar valt til å spele klarinett i musikktroppen.

– Det finst så mange flinke klarinettistar i heile Noreg. Eg trudde ikkje eg hadde ein moglegheit for å komme inn, fordi nivået ligg høgt, seier ho.

Derfor, då ho skulle fylle ut eigenerklæring i 2018, visste ho at ho ville i førsegongsteneste, men 3. Gardekompani var eit urealistisk mål.

– Likevel, etter at eg blei kjend med fleire som skulle prøvespele, fant eg ut at eg ikkje hadde noko å tape, og turde å søke.

Annleis prøvespel

Etter sesjon, som testar ein fysisk, teoretisk og medisinsk før ein kan komme inn i førstegongsteneste, venta Sjursen på prøvespel.

– Eg øvde mykje og fekk god hjelp frå læraren min på kulturskulen, fortel Sjursen.

I år blei prøvespel digitalt grunna Covid-19 og Sjursen sendte inn ein video av to innstuderingsnoter og eit sjølvvalgt stykke.

– Det føltes som ei æve å få svar. Men då den kom var det verdt all strevet, smiler ho.

Øvde ikkje alltid mest

For ti år sidan byrja Sjursen på Sagstad skulekorps saman med nokre venar.

– Eg fekk med meg instrument heim og i byrjinga var eg ikkje den som øvde mest.

Etterkvart slutta venane hennar på korpset og gjekk heller på andre fritidsaktivitar, men ikkje Sjursen.

– Eg ville også gå på til dømes turn på slutten av barneskulen og dette foreslo eg til mora mi. Eg er veldig glad at ho lot meg ikkje slutte på korps med ein gong.

Raskt etterpå fekk Sjursen mykje meir motivasjon til å spele klarinett, og det blei kjekkare for kvart år som gjekk.

– Motivasjonen kom etter at eg blei kjent med andre og kom inn i korpsmiljøet.

På slutten av ungdomsskulen fekk ho tilbod om å bli med i Meland Musikklag og det siste året har Sjursen også spelt på Hordaland ungdomskorps.

– Skal alltid spele klarinett

Sjursen er usikker i kva nivå ho kjem til å spele klarinett etter førstegongstenesta, men ho er sikker på at ho skal fortsetje å spele i korps.

– Eg veit at eg skal spele klarinett fram til lungene mine sluttar å fungere. Eg skal alltid spele klarinett, uansett om det blir eit yrke eller hobby, sluttar Stina Nes Sjursen.