La bak seg 152 600 meter

Per A. Heskestad la i helga bak seg 280 rundar på Bislett Stadion, tilsvarande 152 600 meter. Dette er nesten fire maraton etter kvarandre!

- Eg kunne sikkert klart å gå 10-12 kilometer til på dei siste tre timane, men våga ikkje av helseomsyn, seier Per A. Heskestad, etter å ha sprunge 21 timar i strekk.

Heskestad var ein av 65 deltakarar i herreklassen, og på det beste låg han på ein 12. plass totalt. Men etter ein del timar fekk han føling med ein gamal skade i foten, og han vart tvinga til å setja ned farten noko. Dermed fall han også på resultatlista.

- Dei første elleve timane sprang eg veldig jamt, med i overkant av ni kilometer kvar time. Då eg byrja å merka skaden min etter sju-åtte timar, slakka eg av på farten. Frå 15. time gjekk eg bare heilt roleg fram til 280 rundar var passert. 150 kilometer er nemleg grensa for å få godkjent eit 24-timarsløp, seier han til nh.

Heskestad synest det som er mest interessant for eigen del, er i ettertid å sjå korleis plasseringa hans var gjennom det beinharde løpet.

- Med jamn fart krabba eg stadig oppover på resultatlista, frå 35. plass etter to timar til 12. plass etter 14 timar. Då eg slutta å springa, og berre rusla roleg rundt bana, var det sjølvsagt ein del som sprang forbi meg.

- Då eg gjekk i dusjen var eg nummer 18, og eg vart passert av ytterlegare tre løparar etter at eg hadde gitt meg. Greitt det med berre halvannan fot, seier den spreke Meland-karen.

I tabellen under kan du sjå Heskestad sin progresjon time for time: