(BA:) Det hadde berre gått ni dagar sidan nedrykket til Obos-ligaen, og Brann-speaker Remi André Taule var einvis om at 2021 ikkje kunne verta stort verre. Men det kunne det tydelegvis.
På morgonkvisten julaftan gjekk han ut i skibakken utanfor leiligheita i Tråstølen på Voss. Saman med sambuar, born og foreldra skulle han ha ein aktiv juleferie på fjellet. Skientusiasten ville ut for å testa føret, før julefrukosten med familien.
I full fart nedover løypa, gløymde han ein veldig viktig ting.
– Eg veit ikkje kva som gjorde at eg ikkje var merksam på det, men eg var ikkje førebudd på at eg var på veg inn i eit område med kunstsnø. Då eg traff snøen, sto skia pinne fast og eg fauk framover fleire meter, før eg endte liggande i ei grøft, fortel Taule til BA.
Komplisert brot
Han slo seg kraftig, men syntest ikkje det gjorde veldig vondt.
– Det var ikkje sånn at eg hylte og skreik, så eg trudde ikkje eg hadde knekt noko. Men ein tilsett hjå Voss Resort kom springande, og han var ganske sikker på det motsette. Han fekk tilkalt ambulanse, og køyrt meg ned til Bavallen i kulp.
På Voss sjukehus fekk Taule dei skrekkelege nyheitene etter å ha teke røntgen. Han hadde knust hofta i fleire partiklar, og knekt lårbeinet rett under lårhalsen. Det var ingen veg utanom operasjon. Den kunne ikkje utførast før dagen etter, så Taule måtte bruka julekvelden i sjukesenga.
– Heldigvis hadde eg Mac'en med meg, så eg fekk feira jul saman med familien på Facetime. Dei hadde vore innom sjukehuset med eit par gåver til meg, så det vart jo kjekt på ein måte, sjølv om eg var veldig trøytt av dei smertestillande medisinane.
Skryt
1. juledag gjekk han gjennom ein operasjon i hofta, kor legane sette inn både skrue og vaier. Taule har fått beskjed om at det kan ta seks til åtte veker før dei knuste beina har grodd skikkeleg. Difor ryk resten av skisesongen.
– Men det er ikkje synd på meg, det må du få med. Når du samanliknar med dei andre som ligg på sjukehus med alvorlege sjukdommar, så er jo dette ingenting.
Etter å ha brukt heile jula på sjukehus, har han stor respekt for arbeidet helsepersonell gjer.
– Dei står på for deg og spring rundt som nokre piska skinn. Det er heilt fantastisk korleis dei står på, samstundes som det konstant pip i alarmen frå pasientane. Dette er ei yrkesgruppe som me må ta vare på framover, dei er ekstremt viktige. Og den kirurgiske kompetansen på Voss sjukehus er jo kjent for å vera glimrande, skryt han.
Kan verta nyttår på sjukehuset
Det er ikkje første gong Taule må bruka ferien på Voss sjukehus. I 2019 hamna han på same plass då han fekk hjarteinfarkt i påska.
Kor lenge han skal verta verande på sjukehuset no, er enno uvisst. For beinet må få ro, samstundes som han må starta opp fysikalsk opptrening.
– Måndag klarte eg å komma meg opp i ein gåstol og gå på badet. Eg har prøvd å sitta litt når eg et. Etter kvart skal eg over på krykker, men det kjennast som det er eit stykke att. Legane seier det ser bra ut, så eg er optimist, men det spørs om eg kjem meg heim til nyttår.
– 2021 har ikke vore ditt år?
– 2020 var dårleg for alle, men for meg har det toppa seg i 2021. Neste år må verta ein opptur, seier han håpefullt.
