Frå toppen av Åsane
KVIL: Ronny går på tur i all slags ver. På finne dagar som denne går det an å ta seg ein kvil på toppen. Andre dagar går det knapt nok an å stå oppreist. ALLE FOTO: Benedicte Midthaug Torsvik
Ronny Monsen har dei siste åra vore på Hordvikveten fleire gonger i veka. Målet er minst 100 turar i året, noko han også i år ligg an til å klare med god margin.
– Eg har gått over 75 turar så langt i år, og var her i går og. Det er fantastisk fint her oppe. Eg går i all slags ver. Nokre dagar er det fint som i dag, andre gonger klarar ein ikkje å stå oppreist. Då må eg berre opp og røre varden før eg spring ned att, seier han.
- Les også: Startar ny havfestival på dugnad
Ronny trivst godt i fjellet, og meiner det er aukande trafikk i området. Når vi treff han har han allereie gått opp til Geitanuken og vidare innom Toppe, Hitland og Falkanger til toppen av Veten.
UT PÅ TUR
Knarvik Senter og Avisa Nordhordland vil i ein serie i sommar presentere dei ti flotte fjelltoppane som er med i Tursekken 2017. Dette er ein konkurranse fram til 31. august i regi Knarvik senter og ei rekke samarbeidspartnarar, deriblant Avisa Nordhordland.
Turstoffet er levert av skribent i Senteravisa, Benedicte M. Torsvik, og turgåarar som deler bilde på Instagram.
All informasjon om korleis du deltar i konkurransen finn du på www.knarviksenter.no. Last gjerne opp bilde på Instagram med emneknaggen #avisanh i tillegg.
– Eg synst det er kjekt å sjå at folk går på tur. Når ein går her ofte treff ein mange rutinerte gjengangarar, samtidig som det kjem fleire og fleire her oppe. Veten er lett tilgjengeleg, og det er fint at ein kan gå frå fleire stader. Samstundes gir turen mange moglegheiter for tilpassing anten ein ønsker ein kort eller ein lang tur, fortel han.
På tur i ferien
Søstrene Ada og Sina Mykkel-tvedt gjekk tur til Veten saman den aller første dagen i skuleferien.
– Vi likar godt å gå på tur, helst i fjellet. Vi er ofte på Hordvikveten, det blir nesten kvar helg. I alle fall annankvar, fortel dei to.
Veten er eit populært turmål, og med sine 486 høgdemeter er den og det høgste fjellet i Åsane. Det finst gode stiar til toppen frå så godt som alle sider av fjellet. Vi valde å køyre opp mot Falkanger og Sætregården, kor det er ein fin parkeringsplass. Eit anna alternativ med god parkering er å køyre forbi IKEA til Melingen, kor ein kan starte turen ved å følge Den Trondhjemske Postvei. Dersom ein ønsker ein lengre tur kan ein utvide ved å gå til Høgstefjellet eller Tellevikfjellet.
Kommentarer til denne saken