Denne knuten synest Tormod og Siren er morosam. Men sex- og fylleknutane derimot...
Tormod Hugaas og Siren Jordal synest russeknutar som denne, med frukost i rundkøyringa er kjekke. Men sex-knutane har dei lite til overs for. Foto: Amalie Ulveseth
Nh Ung slo av ein prat med russen under ein frukost i rundkøyringa i Knarvik. Russeknutane blei fort ein sentral del av samtalen.
Klokka 07:45 var Knarvik-russen allereie klar med grill, grillmat, drikke og dekka langbord i rundkøyringa i Knarvik. Rundt bordet sat mellom anna Tormod Hugaas (18) og Siren Jordal (18).
– Vi tar no to russeknutar samtidig. Både «å grille i ei rundkøyring» og «å ete frukost i ei rundkøyring». Eg er ikkje heilt sikker på kva eg får på russehua for desse knutane. For den eine trur eg me får ein plastgaffel, fortel Tormod, samtidig som bilar, bussar og lastebilar køyrer rundt dei og tutar og vinkar.
Mange kjekke knutar
Russetida er i full gang over heile landet. Knarvik-russen markerte tidlegare i veka russetida med å sitte klar i rundkøyringa i Knarvik. Her køyrer alle skuleelvane på Knarvik forbi og får vinka og helsa på russen tidleg på morgonen. Nh Ung slo av ein prat med nokon av russane under frukosten i rundkøyringa. Temaet «russeknutar» blei fort ein sentral del av samtalen.
Kva er russeknutar?
Russen får ei liste med forskjellige oppgåver dei kan velje om dei vil løyse eller ikkje. Det er russestyret på dei forskjellige vidaregåande skulane rundt om i landet som bestemmer russeknutane for deira skule. Det er om å gjere å få tatt flest russeknutar gjennom russetida, og for kvar knute ein tar får ein ein gjenstand som representerer russeknuten knytt fast på russehua. Ein knute blir berre godkjend om den blei vitna av to medruss.
– Eg har vel tatt omkring ti russeknutar så langt. Eg har lyst til å prøva å ta rundt 30–40 knutar. Den morosamaste eg har gjort så langt er at eg har kyssa ein politimann på kinnet, eller der me skulle eta ein meny på McDonald’s på under fem minutt, fortel Siren.
Kvar år kjem Knarvik VGS og andre vidaregåande skular ut med rundt 100–120 russeknutar til den ferske russen det året. Dei fleste skulane har i hovudsak same knutar, berre med ein eigen spinn på dei. Tormod og Siren synest knutane er morosame, sjølv om ikkje alle er like kjekke.
Lastebilar, bussar og personbilar tutar og vinkar til russen som sit å kosar seg i rundkøyringa i Knarvik. Foto: Amalie Ulveseth
– Dryge og unødvendige
– Det å feire bursdagen til ein lærar er ein morosam russeknute me har lyst til å ta. Me har allereie ein lærar i siktet. Dei dumme russeknutane er alle med fyll og sex og sånt. Eg synest personleg dei er litt unødvendige. Det er ganske få som tar dei knutane, fortel Tormod.
Nh Ung
Denne saka er skriven av avisa Nordhordlands ungdomsredaksjon: Nh Ung.
Siren seier seg også einig. Ho fortel at ho synest det er ein del som er litt dryge. Bland anna meiner ho at det å skulle kyssa med ein medruss sin forelder ikkje er innanfor.
– Alle russeknutar må jo utførast med to medruss som vitne. Dette gjer dei fleste knutar som har med sex og sånt ganske dryge.
Fokuserer på det positive
Tormod og Siren har vald å fokusere på den positive sida med russeknutane. Dei synest knutane som «å følga etter ein person i 15 minutt» eller det å grilla i rundkøyringa, er kjekke knutar.
Tormod Hugaas og Siren Jordal synest russedåpen har vore det kjekkaste med russetida så langt. Foto: Amalie Ulveseth
– Det er kjekt å kunne setta i gong sånne aktivitetar som dette. Me får eit betre fellesskap med dei andre russane. Det er heller ikkje vanskeleg å setta i gong sånne ting som dette. Folk er ganske lett å be og vi kosar oss mykje. Sjølv om vi står opp tidleg så byrjar vi seint på skulen i dag, så vi kan kose oss lenge, seier Tormod.
Fellesskapen betyr mest
Dei er begge einige i at det kjekkaste med russetida er fellesskapet. At folk blir meir sosiale. Dei synest det er kjekt når det ikkje lengre berre er ein fest, men ein russefest. Det er fint å høyre til ein fellesskap, synest dei begge.
