Foreslår å auke NRK-lisensen med over 400 kroner
Illustrasjonsfoto. Foto: Foto: Gorm Kallestad / NTB scanpix
Mediebedriftene vil sleppe arbeidsgivaravgift og lanserer auka merverdiavgift på NRK-lisensen som ein av tre måtar å dekke inn kostnaden på.
Det kan gje over 400 kroner ekstra i NRK-lisens for folk flest, skriv Dagens Næringsliv.
I ein høyringsuttale til Kulturdepartementet om framtidas mediepolitikk, skriv Mediebedriftenes Landsforening (MBL) at det viktigaste for dei er å få fjerna arbeidsgivaravgifta media betalar til staten i inntil fire år.
Vil staten skal ta rekninga
Fritak frå arbeidsgivaravgifta vil koste mellom 500 og 600 millionar kroner. MBL vil prinsipielt at staten skal ta rekninga.
Ein av moglegheitene foreininga trekker fram er å heve meirverdiavgifta på NRK-lisensen til 25 prosent. MBL påpeikar at ikkje berre vil finansiere fritak for arbeidsgivaravgift, men også dei andre mediepolitiske tiltaka Mediemangfoldsutvalget foreslo.
Dyrare lisens
Forslaget inneber at lisensen blir dyrare for å dekke inn dei 850 millionar kronene som forsvinn frå «NRK-potten».
Om ein skal dekke inn heile beløpet, vil rekninga per lisensbetalar då aukast med 418 kroner årleg.