Gir vekk 32 år med Nordhordland

Artikkelen er over 12 år gammel

Ivar Nesbø har tatt vare på kvart einaste nummer av avisa Nordhordland sidan den første åttesideren vart utgjeve 20. november 1974. Denne veka overrekte han samlinga til nh-redaktør, Randi Bjørlo.

DEL

Han innrømmer gladeleg at han har litt samlemani, pensjonisten Ivar Nesbø, når han tar imot oss i heimen sin på Kløve. Med ei genuin interesse for historie, og då særleg den lokale, har han i alle år tatt vare på det han har kome over av gamle bilde, skriv, utklipp og dokument. Og så lokalavisa då.

– Eg byrja å samla på Nordhordland frå første nummer, og har sidan tatt vare på så godt som alle avisene, fortel Ivar, som har ei fortid frå skuleverket i regionen.

Lokalhistorikar

Ivar og kona Aud har budd på Kløve i 32 år, og Ivar har samla på avisa Nordhordland nesten like lenge. Det har etterkvart vorte ein heil del kassar, for tru ikkje at ein samlar berre dumpar avisene i bunkar i garasjen. Alle nummera ligg fint samanbretta og arkivert i kassar merka med årstal.

Grunnen til at Ivar byrja å samla på Nordhordland var at han hadde eit ønskje om å jobba med lokalhistorie når han gjekk av med pensjon. Dette er eit arbeid han no er godt i gang med, og planen er at også andre med tida skal få sjå arbeidet.

Ingen saksbruk

– Akkurat no jobbar eg med industrihistoria til bygda. Før i tida bygde dei nemleg bussar nede i vika her, og det er det slett ikkje alle som veit. Eg håpar på å få til ei utstilling som kan verta ståande, fortel Ivar entusiastisk.

I tillegg til dei 55 kassane med arkiverte aviser, har Ivar også mange bøker og album med historiske utklipp frå ulike tidsskrifter. Men Nordhordland-arkivet har han aldri brukt saksa på.

– Eg har nok klipt ut frå Nordhordland og, men når dette har skjedd har eg alltid kjøpt ei ny avis på butikken. Arkivet skal vera heilt, smiler han.

For verdifull til å kasta

At han no gir vekk avissamlinga si, ser han på som heilt udramatisk, så sant han får lov å bruka arkivet om han skulle trenga det.

– Det byrja å verta trongt på loftet, så eg fann ut at eg måtte flytta avisene. Eg meiner samlinga er litt for verdifull til å kasta, så eg ringte først biblioteket. Dei ville ha avisene, men hadde dessverre ikkje plass. Då ringte eg avisa, og Randi ville gjerne ta vare på samlinga. Trur den er i gode hender, seier samlaren som er godt i gang med å samla på 2006-årgangen også.

Artikkeltags