Bokslepp for Sellevoll-bygda: – Det er viktig å dokumentere denne historia, ellers er det borte

Fotograf Arne Årseth inviterte til bokslepp laurdag for si siste bok om bygdene langs Alverstraumen.

DEL

Tidlegare har han laga tilsvarande bøker for Isdalstø, Alverstraumen, og Kvamsvåg. No er turen komen til boka om Sellevoll, Ytre Fosse og Litleskare.

Steinar Hunskår innleia boksleppet. Han er sjølv ein av dei mange som har lånt ut private bilde for at boka skulle kunne bli ein realitet.

– Ikkje veit eg kva som er inni her, men det eg veit er at dette ikkje er ei bygdebok, det er ei bildebok, fortel han.

I boka er det ikkje lagt vekt på at alle skal med, eller at nokon spesielle må med.

– Det er rett og slett eit tidsbilde frå dei siste hundre åra og fram til i dag frå desse grendene våre. Det er veldig kjekt at nokon tar på seg å laga noko sånt for alle. Ein ting er å sitta å sjå i sine eigne album, det gjer vi gjerne mindre og mindre. No får vi kikka inn i nokon andre sine album, det er jo vel så spennande ofte, seier han.

Dugnadsånd

Dugnadsånda stod i sentrum for boklanseringa, og bygdelaget stilte opp med kaker, kaffi og pølsegrilling.

Etter boksleppet sat folk både inne og ute i det fine vêret og koste seg med den ferske boka.

Fire av dei som koste seg med boka i sola er Linda Fosse, Reidun Fosse, Margun Sellevoll og Kari Mjøs.

– Dette er fantastisk, og veldig kjekt for ettertida, seier dei, og legg til at dei seg i mellom kjenner nesten alle i boka.

– Det er noko med å dokumentere dette, elles vert det borte. Om nokon lokale ikkje tek tak i det, er denne historia borte, seier Margun Sellevoll.

– Det er ein fantastisk jobb Årseth har gjort. Det er eit viktig poeng at det ikkje berre er bilde frå gamle dagar, at det er litt nytt og. Difor vil boka ha relevans lang tid framover, seier damene.

Nøgd

Fotografen sjølv er godt nøgd med lanseringa.

– Dette gjekk over all forventning, seier han.

– Når eg såg korleis folk sat ute med langbord og koste seg, det vart litt ekstra folkefest sidan det vart så fint vêr, seier han og rosar grendelaget for at dei ville vera med.

Laurdag kveld vert det bygdefest i grendehuset, og på søndag er det igjen moglegheiter for dei som ønsker seg eit eksemplar av boka.

Artikkeltags