«Min butikk» har flytta ut av det gamle lokalet og inn i senteret: – Ville ikkje slå meg konkurs

NYTT LOKALE: Eigar av «Min butikk», Marianne Taule, er nøgd med valet om å flytte klesbutikken inn i Knarvik Senter.

NYTT LOKALE: Eigar av «Min butikk», Marianne Taule, er nøgd med valet om å flytte klesbutikken inn i Knarvik Senter. Foto:

No er Marianne Taule og resten av dei tilsette klare for å ta i mot gamle og nye kundar i Promenaden.

DEL

Etter nesten tre år i Kvassnesvegen, fall avgjerda på byting av lokale for «Min butikk».

– I november såg vi at det kom til å gå i utforbakke om vi vart verande. Alt rundt oss forsvann og vi blei heilt åleine.

Det seier Marianne Taule, sjef for «Min butikk».

Som følge av anleggsarbeid og nedleggingar av næringar rundt lokalet, gjekk det dårlegare og dårlegare for klesbutikken.

– Eg tenkte først at det ville gå, men så mista vi kundar og omsetnaden gjekk rett ned. Eg ville ikkje slå meg konkurs, så då måtte eg byte lokale til slutt.

Måtte bryte kontrakten

Taule fortel at det var to år igjen av leigekontrakten for det gamle lokalet, men at ho fekk forståing for valet om å flytte.

– Det var mykje som måtte gjerast. Vi måtte løyse oss frå kontrakten, men det ordna seg. På nyåret bestemt vi oss for å flytte inn på senteret.

Måndag hadde «Min butikk» første opningsdag i lokalet, som tidlegare var husa av Elite Foto.

– Dette er ei kjempefin plassering, eg er veldig nøgd.

Ein av tinga som Taule likar godt med plasseringa, er alle ho har rundt seg.

– Det er mange gode, varierte butikkar rundt oss. Vi er som eit eige lite miljø i Promenaden.

– Klede for tre generasjonar

I butikken er dei fire tilsette.

– Her kan vi tilby merker som ikkje andre butikkar på senteret har. Vi har klede for tre generasjonar, seier Taule nøgd.

Sjølv om ho først og fremst er sjef for ein klesbutikk, kan ho også tilby skjønnheitsbehandlingar i same lokale.

– Eg har eit stylingrom der eg tek i mot kundar. Eg selde frisørsalongen min i 2015, så lagde eg ei nettside der kundar kan booke meg.

Det nye lokalet er mindre enn det førre. Undertøysdelen vart difor prioritert vekk.

Taule har likevel trua på at den nye plasseringa kjem til å vere bra for drifta framover.

– Vi har utruleg trufaste kundar, og det har vore fleire nye innom på opningsdagen. Eg er så nøgd, seier ho.


Artikkeltags