Fekk det tøft mot topplaget

FEKK JULING: Anders Dragøy, som her er i duell med Alexander Ødegaard, vart utvist då Radøy/Manger tapte heile 2-8 heime mot Førde. (Foto: Endre Hopland)

FEKK JULING: Anders Dragøy, som her er i duell med Alexander Ødegaard, vart utvist då Radøy/Manger tapte heile 2-8 heime mot Førde. (Foto: Endre Hopland)

Artikkelen er over 7 år gammel

Radøy/Manger hang bra med i banespelet fram til laget vart redusert til ti mann. Derifrå og ut handla det meste om Førde.

DEL

Den suverene serieleiaren Førde kunne returnera frå Sletta med tre poeng og heile 8-2 i målskilnad. Eit slikt resultat lyg sjeldan, men til Radøy/Manger sitt forsvar hang dei godt med lenge.

Førde, med mellom andre tidlegare Sogndal-, Rosenborg-, Viking-, Metz- og landslagsspelar Alexander Ødegaard i rekkjene, skåra 0-1 på litt for enkelt vis, før nemnde Ødegaard sytte for 0-2 med ei perle av eit raid.

0-3 kom frå straffemerket, før Anders Dragøy pådrog seg sitt andre gule kort, og dermed var heimelaget redusert til ti mann med nesten ein time igjen av kampen.

0-4 vart det også før pause, eit resultat som kanskje ikkje stod heilt til kampen. Ikkje det at ikkje Førde fortente måla, men Radøy/Manger burde også hatt eit par nettkjenningar.

Etter kvilen held Førde fram med sin kjappe angrepsfotball, og mål vart det også. 0-5 kom åtte minutt ut i omgangen, før Sindre Marøy reduserte til 1-5. Sidan vart det 1-6, og 2-6, igjen ved Marøy.

Kvar poenga ville hamna var det ingen tvil om, og meir skulle det verta. Førde skåra ytterlegare to på slutten, og påførste dermed Radøy/Manger årets største tap.

Artikkeltags