Konkurrerer om å verta landets beste ungdomsbedrift – Me tek gjerne ny pris
JOBBA VIDARE: – Min klare oppfordring er at de på ein eller annan måte må jobba vidare med dette produktet, seier Børge Brundtland (t.v.) frå Industriutvikling Vest, saman med Steinar Feste Kvamme og fungerande ordførar i Lindås, Nina Bognøy.
Torsdag vart dei overraska med feiring i Knarren. – Dette var ei stor overrasking, seier Steinar Kvamme.
Han er ein av dei fem gutane som står bak elevbedrifta Lecko, som henta heim heile tre premier då alle skulane i Hordaland var samla i Grieghallen til konkurranse i entreprenørskap, med produktet «hjulhjelparen», som gjer dekkskift til ein leik.
I tillegg til 1.-premie for «beste innovative produkt», fekk dei 2.-premie for «beste verdiskapingspotensial» og 3.-plass i kategorien «beste utstilling».
Den flotte standen har dei sørga for sjølv, med god støtte frå lokale sponsorar.
Til NM
No er det NM for ungdomsbedrifter på Lillestrøm i slutten av april.
Torsdag vart dei feira av lærar, medelevar, kommune og næringsliv i Knarren på Knarvik vidaregåande skule.
LES OGSÅ: Sjå den geniale oppfinninga til 16-åringane
– Store gratulasjonar frå oss i Lindås kommune, seier Nina Bognøy, fungerande ordførar i Lindås kommune.
– Ein kvar møblert heim med bil og garasje burde hatt slikt utstyr, seier Bognøy.
TIL NM: No er gutane i Lecko klare for NM for ungdomsbedrifter, Frå venstre: Simon Wilhelmsen, Steinar Feste Kvamme, Gardar Bogetvedt, Mathias S. Verlo og Marius Hosøy Furnes. Begge foto: Morten Sæle
Også Børge Brundtland frå Industriutvikling Vest rosar arbeidet dei fem ungdommane har lagt ned i utviklinga av sitt unike produkt.
– Jobb vidare
– Min klare oppfordring er at de på ein eller annan måte må jobba vidare med dette produktet. Dette er eit produkt som kan konkurrera med kva som helst, seier han.
– Dette viser kor viktig det er å tenka utradisjonelt, og ikkje oversjå kvardagsproblema. Ein kan faktisk løysa dei på ein genial måte, seier han.
LES OGSÅ: Dette initiativet har skapt 37 nye arbeidsplasser på fem år
Dei fem ungdommane gler seg til å delta i NM.
– No skal vi produsere nokre fleire ferdige produkt, og vera endå meir entusiastiske i presentasjonen. Det hadde vore veldig kjekt å vinna ein innovasjonspris til, sjølv om det er kjekt berre å få vera med og delta i NM, seier Steinar Feste Kvamme, som kom opp med ideen til «hjulhjelparen».
– Enno har vi nokre små finjusteringar vi vil få på plass for å få det heilt perfekt, sluttar han.
Kommentarer til denne saken