18-åringen beskriv seg sjølv som ein person som ikkje kan sitje i ro.

– Eg har masse prosjekt. Eg har ein heimelaga trehjuling som eg har laga og skal sjå om eg får til å gå berre på gøy. Eg hadde også ein moped som ikkje heilt funka, seier Gaute Molland (18) frå Indre Haugsdal ved Matre.

Gjennom livet sitt har han halde på med å fikse diverse «ting og tang», som han sjølv seier.

– Men det er denne båten som er mest interessant. Det er kjekt å ha båt. Det blir meir arbeid og teknologi som skal inn. Det er meir spennande, seier han.

Skummelt å gje full gass

Sommaren for to år sidan skaffa Molland seg den 50 år gamle båten på 17 fot som han no brukar tida si på å pusse opp.

– Eg fekk denne til ein rimeleg pris, 12.000 kroner. Eg såg at båtar av denne typen ligg ute for 60.000 kroner, dei som er pussa opp. Så forteneste kan det òg bli.

Båten er ein Nordkapp av den gamle typen.

– Før hadde eg ein mindre båt som blei litt liten. Eg tok båtførarprøven og fann ut at eg skulle hatt ein litt større.

I eit år brukte han båten ut på sjøen. Då var det mykje å teste ut.

Han fortel at motoren er på 130 hestekrefter og kjem opp i 30 knop. Det svarar til ein fart rett under 60 kilometer i timen. Molland trur at det er den originale motoren båten hadde som ny.

– Eg torde ikkje å gje full gass heilt i byrjinga då eg kjøpte den, for båten byrja å leggje seg veldig opp, seier han.

Likevel hadde ein kompis frå Haugsvær lyst å prøve å sjå kor fort båten eigentleg kunne gå.

– Så han sette seg heilt ytst på baugen for å tyngje den ned. Eg drog heilt fram med spaken. Så gjekk baugen veldig opp og så la den seg ned att. Vi fann ut at det er berre i det du får opp farten at den kjem seg opp. Det er litt skummelt første gongen du gir gass og ikkje veit om det, seier Molland.

Måtte få hjelp av traktor

Etter eitt år med å nyte båten byrja det omfattande oppussingsarbeidet. Noko av det første Molland gjorde var å ta ut den over 100 kilo tunge motoren.

– Då måtte eg ha hjelp frå ein traktor på Matre som skulle komme og løfte den. Eg måtte kutte litt på sida av båten og sakte lirke den ut frå båten. Så tok traktoren motoren opp til garasjen.

Sidan har han jobba med båten og motoren kvar for seg.

– Har det vore ei bratt læringskurve?

– Ikkje så veldig. Eg har berre ikkje hatt så mykje tid til det. Det meste eg har lært er frå motoren. Eg får litt meir kunnskap der.

Molland plar sitje ute i båten og fikse på den mens den står i hengar. Han forklarar at han ikkje vil ha båten i vatnet utan motor.

Gjere båten elektrisk

Molland seier at budsjettet for å gjere båten fin både inni og utanpå er på kring 30.000 kroner. Han har ikkje spart opp alle pengane enno, men han har ei inntekt.

I løpet av skuleåret går han TAF-linja på Knarvik Vidaregåande skule innanfor industrimekanikar-faget. Det vil seie at han går på jobb to dagar i veka for å lage utstyr som skal bli brukt på oljeplattformer.

– Eg får litt inntekt der, og no om sommaren jobbar eg der heile veka, som gjer at eg tener ein god del meir. Så mesteparten av pengane som kjem inn går til båten.

18-åringen har ikkje tenkt å selje båten med ein gong den er ferdig.

– No blir båten tilpassa slik eg vil ha den. Vi får sjå om eit par år om eg skal ha noko nytt eller om eg berre skal behalde den, seier han.

Han fortel at han har tenkt tanken å gjere båten om til elektrisk. Men dette prosjektet får vere meir langsiktig.

– Det kjem vel eit punkt der det blir billegare å byggje nytt enn å behalde bensinmotoren. Den sluker drivstoff.

Allereie i eitt år har Molland drive med prosjektet, men som ein kan sjå minkar ikkje motivasjonen for å få båten i endå betre form.

– Eg har byrja, så eg må nesten fullføre. Det blir for dumt å la den bli ståande. Eg finn løysingar på det meste og eg ser ingen grunn til å gje meg.

Les også

Tahir og familien kom som flyktningar til Leknes: – Det viktigaste er at barna mine blir integrerte, får utdanning, jobb og gode liv