Fredag kveld var Nicolai Øvrås Espetvedt og ein kompis på vasscootertur i Salhusfjorden. Turen enda i ein tragedie då vasscooteren velta.

Kort tid seinare var Salhusfjorden fylt av naudetatar og andre instansar som starta leitinga etter Nicolai som er sakna etter ulykka.

Det tok ikkje lang tid før fleire frivillige deltok i søket. I fleire timar var Salhusfjorden fylt av båtar. På land gjekk både frivillige og naudetatar langs strandsona.

Alt for å finne Nicolai.

Tysdag er det framleis ikkje gjort funn, men det tek ikkje håpet frå folk. Måndag kunne ein lese om kompisane til Nicolai som på kort tid samla inn fleire titusen kroner. Pengane gjekk til innkjøp av undervassdrone, og som donasjon til Røde Kors.

Elevar ved Knarvik vidaregåande skule brukte dagen til å lage lunsj til dei frivillige som var ute og leita. På ettermiddagen stilte også Røde Kors opp på Frekhaug kai.

Der kunne dei blant anna by på varm mat og drikke, men viktigast av alt – ein prat til dei som trengde det.

Også kompisen til Nicolai, Kim Dalvang, fortalde rørande til avisa om vennskapet dei har hatt. Dalvang har sjølv brukt mykje tid på leit etter kompisen sin.

Søstera til Nicolai, Malin Rosenborg, har også fortalt korleis dei håper på å finne Nicolai.

– Han er eit fantastisk menneske, alltid omtenksam. Ein som set alle før seg sjølv, seier ho om bror sin til avisa.

Det er tydeleg at den tragiske ulykka har rørt lokalsamfunnet. Sjølv i ei vanskeleg tid finn folk saman. Både naudetatar, nære og fjerne kjem saman om eitt felles mål: Å finne Nicolai.

Det er fint å sjå korleis lokalsamfunnet stiller opp for å hjelpe. Som avis er det spesielt å få formidle dette vidare. Avisa sender varme tankar til alle dei pårørande.