– Vi er her for å kjøpe julegåver. Hittil har vi ikkje skaffa så mange, så i dag er målet å få på plass flest mogleg, seier Lene Lunde.

Avisa Nordhordlands utsende reporter møter ho og dottera Isabell Lunde Skauge på promenaden i Knarvik senter søndag ettermiddag. Familien frå Alverstraumen var blant dei mange som nytta dei søndagsopne butikkane på Knarvik senter til litt julegåvehandling 12. desember.

Litt lengre borte er Madeleine og dottera Ellie. Dei er ikkje i senteret for å handle julegåver, men klede.

– Det er jo Luciadagen i morgon, og då må Ellie ha kvite klede med seg i barnehagen. Det hadde vi ikkje, så då blei det ein tur på senteret. Så har vi i tillegg vore borte og høyrd på musikken. Ellie har dansa, fortel Madeleine.

Det er god trykk på Knarvik senter søndag ettermiddag. Dei handlande er i konstant rørsle, og storparten går med målretta blikk frå butikk til butikk.

Andre tar seg tid til å stoppe opp og kanskje sette seg ned på kafé eller på torget. Der spelar Alverflaten Jazzband opp.

Kjende, klassiske jazzmelodiar fyller sentertorget. Soloane avløyser kvarandre på fleire nummer, heilt til melodien blir sett i bakgrunnen av ei nydeleg stemme.

– Just a closer walk with thee, syng vokalist og trommeslagar Rolf Raknes.

– Ein del har fått det travelt

Medan bandet spelar og lagar ei avslappa oase for dei som er trøytte av shopping, hastar andre forbi. Det er 289 timar att til sølvgutane skal synge jula inn.

– Mange har stålkontroll og kjem til boden min med ei liste som dei kryssar av på når dei har handla, men inntrykket mitt er at ein del også har begynt å få det litt travelt, seier Annette Haugen Soltveit.

Vi møter ho eit stykke nedover gata som går vest/sørvest frå sentertorget, mot Meny og Power sine butikkar i enden av senteret. Der har ho stått mykje dei siste vekene og selt heimestrikka tøflar. No har ho siste opningsdag i boden før jul.

– Dette er det fjerde året eg har brukt mykje tid på å selje heimestrikk i senteret før jul, fortel Haugen Soltveit.

Ho har strikka sidan ungdommen og hatt det å selje heimestrikka varer som hobby i rundt til år. Tidlegare har ho vore mykje rundt på julemesser, men for nokre år sidan fann ho ut at det var kjekkare å ha boden på senteret i Knarvik.

– Det er koselegare å stå her. Eg møter så mykje kjentfolk, ofte kjem eg heim nesten utan stemme fordi eg har prata slik. I tillegg er det fleire buer som brukar å stå her i denne delen av senteret. Det er kjekt, då blir vi eitt lite fellesskap.

– Ein liten tradisjon

Tilbake på sentertorget, spelar Alver Jazzband framleis sørstatsjazz frå ca. 100 år tilbake. Det er det som er lidenskapen for septetten, som no har spelt saman i 30 år.

– Eg trur vi faktisk kan seie 31 år, og vi er dei same sju no som då, seier Jan Helge Alvær.

I løpet av den tida fortel Alvær at bandet har vore med på mykje forskjellig. Det er heller ikkje første gong Alvær, Knut Bjørnevoll, Normann Fosse, Kjell Alver, Arnljot Jordal, Bjarte Skintveit og Rolf Raknes spelar på Knarvik senter før jul.

– Det er faktisk ein liten tradisjon at vi speler her i førjulstida, sjølv om det ikkje er julemusikk vi driv med. No har det vore få oppdrag det siste halvanna året, så då er det veldig stas med spelejobb att, seier han.