Busstreiken er over - dette får bussjåførane i lønsauke

(BA): – Likevel må folk belage seg på at det vil vere driftsforstyrrelsar utover heile dagen, skriv Yrkestrafikkforbundet i ei pressemelding torsdag morgon.

Eit fleirtal av forhandlingsdelegasjonen anbefalar oppgjeret. No skal forhandlingsresultatet ut på uravrøysting til medlemmane i dei fire organisasjonane.

– Dobla det opprinnelege tilbodet

Dersom forslaget får fleirtal blant den samla medlemsmassen, blir oppgjeret godkjent.

– Vi har meir enn dobla det opprinnelege tilbodet frå arbeidsgjevar. Det blir gitt generelle tillegg på til saman 5,50 kroner, samt 1 krone som fagbrevtillegg i 2020, uttaler forbundsleiar i Yrkestrafikkforbundet Jim Klungnes i ei pressemelding.

– Partane har gjort forbetringar i avtalen som hindrar at bussjåførane kjem dårleg ut i samordna oppgjer og påfølgande mellomoppgjer, slik som i 2018 og 2019, uttaler forbundsleiar i Fellesforbundet Jørn Eggum.

– Lønnsvekst på 20.000

Ifølge VG opplyser Fellesforbundet at alle er sikra ein lønnsvekst på 9 kroner. Dette blir fordelt med 6,50 kr i lønnsauke i 2020 og ei opptrapping med 2,50 kroner i 2021. I tillegg kjem det generelle tillegget i mellomoppgjeret i 2021.

– Årslønnsveksten blir då nærmare 20.000 kroner for den enkelte sjåfør. Av andre gjennomslag har vi sikra at det skal jobbast med å sjå på arbeidstidsordningar og sikkerheitstiltak, seier Eggum.

Takkar folket

Dei første bussjåførane blei tatt ut i streik søndag 20. september. Totalt la over 8000 bussjåførar landet over ned sitt arbeid, og streiken har ramma heile landet.

– Vi vil takke befolkninga og passasjerane våre for den massive støtta vi har opplevd gjennom streiken, seier forhandlingsleiar Stein Guldbrandsen i Fagforbundet