Eikanger i trening igjen

Mykje tydar på at Eikanger stiller A-lag i 5. divisjon neste år. Kvar onsdag er det mellom 20 og 30 på trening i Nordhordlandshallen.

- Vi har ikkje kome så langt enno at vi kan seia sikkert at det vert lag, men interessa er absolutt til stades, seier Richard Toft som inntil vidare leiar treningane saman med ein annan Eikanger-veteran, Kjell Øyvind Nævdal.

Eikanger såg seg nøydd til å trekka laget sitt frå 4. divisjon etter halvspelt serie i fjor. Dersom dei melder på seniorlag lag i seriesystemet i år, spelar dei i 5. divisjon.

Ventar dei ytterlegare eit år med å melda på lag vil laget starta heilt på botn, i 7. divisjon i 2011-sesongen.

- Det er forferdelig kjedeleg om vi må begynna heilt på nytt. Då kan det vera lenge til Eikanger får eit bra A-lag igjen, seier Toft til Nh.

20-30 på trening

Sjølv om Eikanger sitt A-lag trekte seg frå årets serie, har klubben like vel bite godt frå seg i år. Gutelaget vann serien og spelte seg heilt til kretsmeisterskapsfinalen.

Sjuarlaget på seniorsida vann også serien. Laget gjekk i tillegg sigrande ut av sin kretsmeisterskapsfinale. Det er med andre ord gode spelarar, både unge og meir rutinerte, i klubben sine rekkjer.

- Vi har absolutt moglegheit til å få eit slagkraftig lag, og optimismen er stor. No har vi vore frå nokon og 20 til rundt 30 på treningane, og veldig mange av desse er unge spelarar. Trur det er veldig viktig både for klubben og spesielt desse unge spelarane at vi har eit bra seniortilbod, seier Toft til Nh.

Solide spelarar

Richard Toft var sjølv ein av dei sentrale spelarane då Eikanger, under leiing av under Øystein Bratvold, rykka opp to divisjonar på to år, og stabiliserte seg i 4. divisjon.

Han fungerte også som spelande assistenttrenar i periodar. Om han skal ha noko trenaransvar dersom det vert lag neste sesong kan han enno ikkje seia så mykje om.

- Eg tvilar på at eg vert nokon hovudtrenar. Det har vore fleire år med veldig mykje fotball no, og det har vore godt med ein liten pause. Men eg vert kanskje med i eit trenarteam, seier midtbanekrigaren som etter alle solemerke også får med seg brørne Daniel og Ruben i spelarstallen dersom Eikanger melder på lag.

- Vert ikkje tilsett trenar

Andre spelarar som nokså sikkert er med eit eventuelt nytt Eikangerlag er Roy Ånensen og Simen Dalland som trass ung alder allereie har erfaring frå 4. divisjon.

- Robert Andvik har også sagt at han vil vera med oss. I tillegg har Christoffer Knudsen og Aleksander Hindenes frå NBK trena med oss no etter sesongen, men kva dei gjer neste sesong veit eg ikkje, fortel Toft.

Leiar i fotballgruppa i Eikanger, Svein Nesbø, håpar laget hans er med igjen i serien frå og med neste sesong, men han fortel at det vert på litt andre premissar enn tidlegare.

- Det vert ikkje tilsett nokon trenar, for det har ikkje klubben økonomi til, seier han til Nh.

Påmeldingsfrist for lag i 5. divisjon er 9. desember.