Hordabø skal opp igjen

Lag: Hordabø

Divisjon: 6. divisjon, avdeling 3

Trenarteam: Gisle Taule (hovudtrenar), Frode Myking (oppmann)

Spelarstall: Thomas Risnes, Thomas Marøy, Terje Marøy, Rune Marøy, Frode Myking, Gisle Mjøs, Arve Hella, Morten Kvamme, Remy Gudmundsen, Håvard Villanger, Håvard Stevnebø, Bjarte Grindheim, Bjarte Helland, Kenneth Husebø, Stein Ove Valdersnes, Helge Eikeseth, Per Kristian Villanger, Tor Sverre Kolstad.

Ambisjonar: Opprykk

- Vi må prøva å koma oss opp igjen, og vi har eit såpass godt lag at vi bør klara å hevda oss, seier spelande trenar, Gisle Taule til nh.

I fjor gjekk Bø-løvene på ei tapsrekkje frå ei anna verd, og sjølv om det heile tok seg opp litt på slutten av sesongen, måtte dei grønkledde likevel bita i det sure eplet, og konstatera at nedrykket var eit faktum. Men no er fjoråret gløymt, og Gisle Taule har trua på ein ny vår.

- Vi har stort sett den same stallen som i fjor, og vi bør vera gode nok til å ligga i 5. divisjon. Opprykk er dfor eit klart mål, seier han.

Amputert sesongoppkjøring

Hordabø-trenaren ser for seg at laget hans skal vera eit topplag gjennom heile sesongen, tiltross for at sesongoppkjøringa har blitt noko amputert.

- Vi har slite ein del med skader, og influensaen sette ut veldig mange av spelarane. Men dei fleste er med igjen no, så eg trur vi kjem til å bita godt ifrå oss, seier han.

Taule tok over trenaransvaret i klubben då det berre 4-5 kampar stod att av fjorårssesongen. Laget fekk seg nokre poeng på tampen, og kunne med eit naudskrik ha berga plassen i siste runde. Men då var dei avhengig av hjelp frå naboane på Austrheim, noko dei ikkje fekk.

- Bittert nedrykk

- Vi gjorde jobben, men Austrheim tapte i siste runde, og då var det ikkje noko å gjera med den saka. Det var eit svært bittert nedrykk, men det er no eit gløymt kapittel. I år må vi berre koma oss opp igjen, seier Hordabø-trenaren.

Hordabø hadde i fjor inne både Kenneth Johansen og Svein Egil Christianslund i rekkjene sine. Begge desse har returnert til Radøy/Manger framfor årets sesong.

- Det er klart dei er gode spelarar, men dei ville spela litt høgare opp i år, og vi skal nok klara oss godt likevel, seier Taule.

Også midtstoppar Morten Christensen manglar i årets Hordabø-lag, då han grunna mykje jobbing har lite tid til fotball.