Flotte forhold for LM på ski

Det blir meldt om knallflotte forhold i Hopsdal-løypene framfor Lindåsmeisterskapet i morgon.

Etter ein vinter vi må svært mange år tilbake for å finna maken til, har skiinteressa både mellom nye rekruttar og gamle travarar blomstra for fullt.

- No håpar vi at svært mange blir med og gjer Lindåsmeisterskapet til ein skikkeleg fest, seier Steinar Mørch i arrangørstaben.

Blir flytta

Arrangørane tar ikkje sjansen på å avvikla vinterens vakraste eventyr i Dyrkolbotn, og difor er Lindåsmeisterskapet i år flytta til Hopsdal.

- Det ligg eit tjukt lag av sørpe og overvatn under snøen på vatnet i Dyrkolbotn. Staven blir rett og slett hengande igjen. Også av omsyn til sikkerheit har vi flytta arrangementet i år, seier Mørch.

Han kan frista med eventyrlege forhold – rikeleg med snø og flotte spor.

- Arrangementet er tilrettelagt for at også dei aller yngste skirekruttane kan vera med ei kilometer lang løype.

Claus i storform

Det store spørsmålet er om nokon kan ta kampen opp med Claus Sellevoll.

37-åringen ser ut til å vera i sitt livs form, og har vist ryggen til konkurrentane også i kretsrenn denne vinteren.

Det kan bli ein spennande duell dersom Jo Harald Færø stiller til start, eller kanskje broder Halfdan Emil kan ta kampen opp.

I kvinneklassen har Hege Brekke vist seg som den raskaste så langt i vinter.

Einvegskjørt

Det er tilrettelagt med parkeringsplassar utover marka på Hopsdal. Men det kan bli ein smule kaos langs Hopsdalsvegen fram mot rennet.

- Difor håpar vi på ”einvegskjøring” i tidsrommet 10.-12.00 i morgon. Skal noko ned igjen før rennet er i gang, kan det bety kork, seier Steinar Mørch.