Unge syklistar tråkka til

Patrick Smørdal Osa (4) frå Hilland tråkka til skikkeleg frå start i den yngste gruppa. Med nummer 66 på brystet låg han først heilt til den første svingen, men så vart det tungt i motvinden oppetter langsida på Nordhordlandshallen.

To rundar rundt hallen er langt nok for små bein, godt då at det venta gratis drikke til alle i mål.

Patrick er litt beskjeden når Nh dukkar opp med kamera, men han er tydeleg stolt av sin knallraude Spidermann 3 sykkel.

-Kjempegøy sjølv om eg ikkje kom heilt fremst, seier Patrick som lett som berre det heldt balansen utan støttehjul. Pappa Geir Atle Osa fortel at det var unnagjort på eit par minutt å læra poden å halda balansen på to hjul.

-Medaljen skal eg henga på rommet mitt, det er den aller første medaljen eg har fått utanom på minimila, seier fireåringen.

Etter veker med regn gjekk barnerittet i flott haustsol, og mange la familien sin søndagstur til området rundt hallen. Litt knall og fall vart det i ein og annan sving, men ikkje verre enn at alle kunne retta litt på hjelmen og karra seg på sykkelen for å fullføra.

- Kjempekjekt at det kom så mange, dette kjem vi heilt sikkert til å gjera neste år og, seier rittleiar Nina Olsvoll frå Nordhordland Sykkelklubb.