Ekteparet Hans og Ingrid Ringereide bur berre eit par kilometer frå Sløvåg. Dei har fått kjenna etterverknadane etter eksplosjonen hjå Vest Tank nært på kroppen. I dag er det eitt år sidan det small.

- Det er rett og slett ei utruleg plage. No har dei øydelagt ein sommar, og det ser ut til at dei skal øydeleggja endå ein, seier Hans og Ingrid til nh.

Ingrid har slite med både kvalme og tørrhoste etter eksplosjonen, medan Hans har hatt problem med svært tørre auge. Slik var det aldri før det small.

- Vi har aldri fått skikkeleg greie på kva plagene skuldast. Det har vorte sagt at det er svovelbindingar som er i lufta, men svovelbindingar kan jo vera så mangt. Det er så mykje snakk at ein ikkje veit kva ein skal tru, seier Hans, som har budd nesten heile livet på garden i Eidsbotn, nokre steinkast frå industriområdet i Sløvåg.

- Mange dårlege

Ein rapport kommunelege Tommy Norman i Gulen har laga, viser at folk i kommunen framleis slit med sjukdom og plager, eitt år etter eksplosjonen. Trond Rambjørg er ein av dei som vart verkeleg dårleg då lukta kom sivande første gongen.

- Eg var heime då det small, og lukta kom eit kvarter seinare. Eg måtte springa rett og kasta opp, seier Rambjørg til nh.

Også han bur i Eidsbotn, og når vinden står på frå sørvest, kjem lukta framleis sivande.

- Eg merkar det straks. Hovudverken kjem med det same eg kjenner lukta, seier han.

Gjermund Halsvik, som held til i Halsvikvågen, kan fortelja at lukta er ei sann plage for folk.

- Ingen hjå oss har vorte alvorleg sjuke, men eg veit om fleire som har det. Men lukta er skikkeleg ubehageleg og hemmande, seier han.

Dårleg drikkevatn

For ekteparet Ringereide sin del, har tida etter eksplosjonen vore alt anna enn lystig.

- Det er forferdeleg deprimerande å oppleva noko slikt. Vi har hatt eit år med nedsett livskvalitet, og vi fryktar at det vert eit år til, seier dei to.

Då nh var på besøk hjå ekteparet, var det berre eit svakt snev av dårleg lukt i lufta. Dei to kan fortelja at dette varierar frå dag til dag, avhengig av vindretninga.

- I dag er det nordavind, og då merkar vi det ikkje så mykje. Men det luktar enno, seier Hans.

For å understreka kor gale det heile er, får nh sin utsending smaka på drikkevatnet til husstanden. Det smakar meir olje enn vatn, tiltross for at det ser heilt reint ut.

- Vi er tre hus som delar kjelle, men eg kan ikkje førestilla meg at dette vatnet er bra for kroppen. Det er då ikkje slik vatn skal smaka, seier han.

- Same leksa

Det har lenge lagt nærare 400 tonn avfall igjen i Sløvåg etter eksplosjonen, avfall som dei nye eigarane Alexela har prøvd å fått fjerna.

Under folkemøtet på Dalsøyra i slutten av desember i fjor, lova selskapet at alt skulle vera rydda opp i innan tre månader. Denne fristen har gått ut for fleire månader sidan, noko også ekteparet Ringereide har merka seg.

I avisa Strilen torsdag opplyste Alexela at dei no hadde gjort ein avtale med eit norsk firma som skulle ta imot avfallet. Dette fekk Ingrid og Hans til å håpa, men det skulle ikkje vara lenge før tvilen var tilbake.

Fredag, ein dag seinare, stadfesta nemleg Alexela ovanfor Bergens Tidende at ingen avtale var underteikna enno, sjølv om selskapet skal vera i direkte forhandlingar med fire ulike selskap.

- Det er den same leksa igjen. Vi har ingen tillit til det som skjer, seier Hans til nh.

- Krev dokumentasjon

- Vi gler oss kvar gong vi høyrer noko positivt, men det skjer aldri noko, legg Ingrid til.

Dei to undrar seg veldig over korleis det kan ha seg at ingen ryddar opp i rotet.

- Det er merkeleg at SFT er så tilbakehalden i denne saka, og går god for opplysningar utan å kunne dokumentera dei, seier Hans.

Ekteparet Ringereide håpar på ei snarleg løysing på problemet, men understrekar viktigheita av at ting vert gjort på ein skikkeleg måte.

- Det må kunne forventast at bedrifta legg fram kontrakten for at dei har fått ein mottakar, og kan visa kvittering for at avfallet er mottatt. Det er veldig viktig at SFT no har augo opne, slik at ikkje avfallet berre forsvinn utan at nokon veit kvar, meiner dei.

Les meir om eksplosjonen i Sløvåg her