Hellfuck, Nilsen og Paus til Utkant

Det er no klart at to av dei mest publikumselska nykomarane i Bergen spelar under årets Utkantfestival i Skjerjehamn. Også Ole Paus set kursen mot Gulen siste helga i juli.

Utkantfestivalen i Skjerjehamn har namn på seg å skaffa gode artistar, og heller ikkje i år sviktar dei. Frå før er Ralph Myerz & The Jack Herren Band og Skambankt klare for å rocka havgapet.

No får dei selskap av landets kanskje drygaste band, ein gjeng genierklærte loddefjordingar og ein rusten, men folkekjær herremann.

- Ole Paus startar det heile torsdagen. Vi har tradisjon med ein visesongar opningsdagen, og vi er glade for å ha booka Ole Paus. Etter konserten vert det dans utover natta, seier presseansvarleg for Utkantfestivalen, Linn Dyveke Wilberg til Nh.

- Seksuelt eksplosiv rock

Der Ole Paus syng om det meste mellom himmel og jord, er fredagens trekkplaster noko meir selektiv i kva han puttar i låtane sine.

Bjørn Hellfuck fekk halve landet til å synga om krabbeklør i undikken siste halvdel av fjoråret, men radiohiten ”Krabbeklo i undikken” er utvilsamt det Hellfuck-songen som er mest beskjeden i ordbruken.

Det som byrja som eit undergrunnsfenomen i Bergen har verkeleg slått seg opp og fram dei siste månadane. For nokre veker sidan spelte Hellfuck for ein fullsett Peer Gynt-sal i Grieghallen, og no er bandet på Norgesturné med fersk plate.

Til sommaren ventar altså Utkant.

- Dette er seksuelt eksplosiv rock og visesong med ein ordbruk som kan gjera sjølv den mest garva sjømann blyg. Med Bjørn Hellfuck på scena vert det allsong, seier festivalsjef Viggo Randal.

- Manglar superlativ

Også lørdag er det musikk frå Bergen som står på agendaen. Genierklærte John Olav Nilsen og gjengen er saman med Ralph Myerz & The Jack Herren Band hovudattraksjonane.

John Olav Nilsen og gjengen er eit av fleire band frå Loddefjord som har slått gjennom dei siste åra, og med albumet ”For sant til å være godt” har Nilsen og band fått kritikarar rundt om i det ganske land til å ta av seg hatten og trilla femmarar og seksarar på terningane.

- Eit samla preseskorps manglar superlativ når Bergens nye ”Elvis”, John Olav Nilsen, skal beskrivast. Eg må seia meg samd, seier festivalsjefen.

200 helgepass selde

Eit litt mindre kjend, men absolutt lovande band, er også klar for Utkant. Mhoo, som mellom anna fekk ein seksar for sin opptreden under byLarm, er blant banda som spelar i Skjerjehamn siste helga i juli.

- Vi er veldig fornøgd med å få fatt i dette bandet, seier presseansvarleg Wilberg til Nh.

Ho kan vidare opplysa om at det allereie er seld 200 helgepass, endå det er fleire månader til festivalen går av stabelen.

- Det lovar jo veldig bra. I år kan vi risikera at enkelte dagar vert utseld, så det er nok lurt å vera tidleg ute med å kjøpa billettar, seier ho.