Bjørn Olav heidra av minnefondet

Leif Øksnes var ein av dei beste fotballspelarane i distriktet då han brått gjekk bort, berre 27 år gamal. Men Øksnes var og oppteken av meir enn berre det som skjedde ute på bana. Minnefondet er oppretta for å føra vidare hans tankar om å gjera noko for dei mange som jobbar utrøyteleg dugnad.

Ei betre ramme rundt utdelinga enn miniput-turneringa i Nordhordlandshallen kunne neppe vore valt. Mora Kari Gerd trekte då og fram den flotte aktiviteten i hallen som noko sonen ville sett pris på. På ein fin måte fortalde ho dei åtte-ti år gamle fotballspelarane kor fint sonen hennar hadde det med allsidig idrett, og korleis han alltid snakka om dei mange som ofrar seg for at andre skal få eit tilbod på fritida.

– Mange gjer eit stort og flott arbeid for andre, og i år har valet falle på Bjørn Olav Benjaminsen i Lindås UL, seier Kari Gerd Øksnes.

Benjaminsen sjølv er sjølvsagt takksam og beæra over tildelinga. Pådrivaren har jobba med ungdomslaget i 30-35 år.

– Hugsar ikkje heilt kortid det starta, men eg hugsar godt korleis. Vi var nokre karar som spelte musikk til revyar. Etter ei oppsetting oppdaga eg plutseleg at eg var ein av instruktørane, ler han.

Benjaminsen delar elles prisen med både laget og bygda.

– Bygda er glade i oss og vi i bygda. I år har det verkeleg tatt av for ungdomslaget, men så er vi då og bortskjemt med støtte og publikum, seier han.

Sjølve prisen består av eit diplom, samt ein pengesum. I det høve vart det og nemnt at det framleis er ønskeleg med fleire bidragsytarar til fondet. Både private, lag og verksemder kan bidra, nærare informasjon om det får ein hjå Sparebanken Vest i Knarvik senter.