Radøy/Manger på rett spor

Det ekstraordinære årsmøtet i Radøy/Manger Fotballklubb gav samrøystes oppslutning om den kursen som styret har vald for vidare drift av klubben.

- Diverre kunne oppmøtet vore større, berre 16 personar av ein medlemsmasse på 500 møtte. Og dei som møtte, er eldsjelene våre og nokre få til, seier klubbleiar Truls Berntsen.

Han er likevel optimistisk i forhold til klubben si framtid.

Det ekstraordinære årsmøtet søndag er eit resultat av at Radøy/Manger rett og slett ikkje har folk til å driva klubben. Styret har sett situasjonen så alvorleg, at dei har vurdert å leggja ned drifta.

Men først vil dei prøva frivillig tvang. Det inneber at kvart av laga i klubben må stilla med minst ein trenar, ein lagleiar og ein person som skal inngå i klubben sin organisasjon.

- Dette fekk vi altså gjennomslag for på møtet. Kvart lag har fått frist til førstkommande søndag til å koma med lagliste og namn på desse personane. Deretter set vi i styret oss ned og syr saman ein kabal. Og den nye organisasjonen vil bli presentert og styret valt på ordinært årsmøte søndag 21. februar, seier Berntsen.

Han seier han har tru på at ei slik ordning kan betra arbeidsvilkåra betydeleg.

- Eg har hørt at foreldregrupper rundt om har diskutert og godtatt ei slik løysing. Her har vi lagt ein liten, men veldig viktig stein på vegen, seier Berntsen som er klar på at ei slik omlegging av organisasjonen vil kreva god oppfølging vidare.

Riset bak spegelen for lag som ikkje leverer liste, er at laget ikkje vil bli meldt på i serien, ikkje får tildelt treningsutstyr eller treningstid i Radøyhallen, får siste prioritert til treningstider på anlegga ute, og vert ekskludert frå Manger Cup.