Droppar vindmøller på Radøy

For lite vind og motvind hjå grunneigarane gjer at Vestavind kraft gjev opp Radøy vindpark. Danskeigde Mjøs Vindpark går derimot vidare med sine planar.

- Målemasta vi ha hatt ståande på Villanger har vist at det er meir turbulens enn venta, og i tillegg mindre vind. Det gjer prosjektet meir teknisk krevjande, og mindre lønsamt, skriv Astrid Håvik i BKK Produksjon i meldinga som i går gjekk ut til mellom anna Radøy kommune og Norges Vassdrags og Energidirektorat (NVE).

Ho viser og til den lokale motstanden.

To selskap

To selskap har meldt interesse for å byggja ut vindkraft på Radøy. Vestavind Kraft har gitt sitt prosjekt namnet Radøy vindpark, medan danskeigde Gefion står bak Mjøs Vindpark.

Områda dei to selskapa har merka ut overlappa delvis kvarandre, og Norges Vassdrags og Energidirektorat (NVE) gjorde det under eit folkemøte på Sletta i fjor haust klart at det maks ville vera plass til ein utbyggjar i området.

Danskane sin søknad dreiar seg om utmarka mellom Villanger og Mjøs, medan Vestavind har vore meir vage og nøya seg med å setja ein ring rundt eit større område nord på Radøy. Hovudskilnaden er at Vestavind også har hatt med planar om møller i Haugland-området.

Mjøs Vindpark har allereie etablert intensjonsavtalar med fleirtalet av grunneigarane i området. Eit eige grunneigarlag er etablert som følgje av planane om vindkraft.

15 av 16 medlemmar har skrive under intensjonsavtale, i tillegg har to grunneigarar som er motstandarar latt vera å bli med i grunneigarlaget.

- Claus Gad Rassmussen i Mjøs Vindpark seier at dei går vidare med sine planar, og at dei meiner det er rikeleg vindressurs i området.

Har reagert på Vestavind

Vestavind kraft på si side har møtt motvind, særleg frå grunneigarane i Haugland-området.

Knut Magnus Haugland har leia an i motstanden. Han var naturleg nok svært godt nøgd då han i går fekk melding frå BKK om at prosjektet vert skrinlagt.

- Her på Haugland har det vore 100 prosent motstand, vi har heilt andre tankar om kva området kan brukast til. Må seia at vi har reagert på måten BKK og Vestavind har gått fram på.

- Ein får presentert ein avtale som helst skal signerast i full fart, lenge før folk veit noko om kva dei eigentleg skriv under på. Den informasjonen vi har om prosjektet og vindkraft i dag, har vi fordi vi sjølve har stått på og skaffa den til veges.

- Det er nærliggande å seia at utbyggjar nærmast forsøker å føra folk bak lyset, seier Haugland.