Fisken døyr av dykkarsjuke

I haust har fleire titals sjøaure vorte funnen flytande med buken i vêret i Matreelva i Masfjorden.

Dødsårsaka ser, av alle ting, ut til å vera dykkarsjuke!

I slutten av oktober var Arnold Matre, som er leiar i Matre Elvelag, på sauesanking saman med ein heil skuleklasse.

Langt oppe i Matre-elva, like ved den vesle kraftstasjonen ved Hommelfossen, kom sauesankarane over ein god del daud aure.

- Det var mest småfisk vi fann, både elveaure og sjøaure, men det var såpass mange daude fiskar at eg tok kontakt med fiskeforvaltar Atle Kambestad hjå Fylkesmannen i Hordaland, seier Arnold Matre til Nh.

Dykkarsjukeeffekt

Ei stund seinare fekk Matre tilbakemelding frå Kambestad, og årsaka til fiskedøden var ikkje av den heilt vanlege sorten.

Auren hadde nemleg late livet som følgje av dykkarsjuke.

Forklaringa skal vera at kraftverket skapar ei overmetting av gass i vatnet. Dette skuldast i følgje forskarane ved Uni Miljø at rista der vatn vert suge inn i kraftverket, enkelte gongar har gått tett.

Når dette har skjedd har luft vorte suge inn saman med vatnet. Den ekstra lufta har ført til gassovermettinga i vatnet.

Når fisken får denne gassen i blodet oppstår ein tilstand tilnærma dykkarsjuke.

- Skjerpar overvakinga

Det vart observert død fisk i Matreelva fleire gongar i sommar og haust, men Jarle Hodne hjå BKK, som eig Hommelfoss kraftverk, fortel at situasjonen i Matre-vassdraget var spesiell ved dei to best dokumenterte tilfella av fiskedød.

- Det var i tørre periodar med lite vatn i elva. Då fekk elva nesten berre vatn frå Hommelfoss kraftverk, med mykje innblanda luft, seier han i følgje Bergens Tidende.

BKK lovar no å syta for å reinska den nemnde rista ved vassinntaket oftare for å forhindra at for mykje luft blandar seg med vatnet.

- No skjerpar vi overvakninga. Vi var ikkje merksame på kva som kunne skje med fisken når rista går tett, seier Hodne.

- God elv

Matreelva er ei svært populær fiskeelv. Faktisk var elva i 2008 best i heile Hordaland, med mellom 400 og 450 fanga sjøaurar i sesongen.

Arnold Matre ser ikkje for seg at fisk med dykkarsjuke kjem til å verta eit stort problem for sjøauren i elva.

- Fiskedøden har skjedd i øvste delen av elva, og ikkje der folk fiskar. Vi satsar på at rutinane kjapt kjem i orden, slik at vi ikkje får meir død fisk. Elva er svært god, spesielt med tanke på at den er regulert, og slik vil vi ha den også i framtida, seier Matre til Nh.