Reagerer på Facebook-skuldingar

Huseigar Ole Tom Ones reagerer på den framstillinga saka om den vidare drifta av Garveriet har fått.

– Skuldingane på Facebook er tatt ut av einkvar samanheng, seier han.

Nh skreiv onsdag at Margunn Solsvik gir opp drifta av Gaveriet Restaurant AS, då det ikkje har vore mogleg å koma fram til ein husleigeavtale med noverande eigar, og at den leigekontrakta ho er tilbydd, vil medføra ”økonomisk ruin”.

- Går med overskot

Dette reagerer huseigar Ole Tom Ones på.

- Solsvik har lagt fram resultatrekneskap for ein periode i 2009 og budsjett for 2010 - inkludert husleige, som viser overskot, seier Ones til nh.

Han meiner han har strekt seg svært langt i dei seks åra Margunn Solsvik og Karstein Havreberg har vore leigetakarar på Garveriet.

- I denne perioden har eg både redusert husleiga med 10 000 kroner per månad og ettergitt eit betydeleg beløp i uteståande leige for å strekkja ut ei hjelpande hand, seier Ones.

Han leigde ut lokalet fullt utstyrt med møblar og driftsutstyr, slik at leigetakar ikkje trengte investera ei krone før dei sette i gang i 2004.

– Det einaste kravet var at driftsutstyret vart vedlikehalde. Dei som går på Garveriet veit korleis stolar og bord ser ut i dag, seier Ones.

Reagerer på Facebook

Huseigaren hadde ikkje tenkt å ta til motmæle mot kritikken som vart retta mot han. Men etter å ha sett nokre av dei skuldingane som er framsett av støttegruppa på Facebook, føler han grunn til å reagera.

- Det er tydeleg at dei som skriv der, ikkje er kjende med dei faktiske forholda, seier Ones rimeleg oppgitt over det han oppfattar som skitkasting.

- Tenk kva drift det kunne gitt for henne om dei same medlemane, meir enn 1300 på Facebook-sida, faktisk hadde gått på Garveriet, seier han.

Ones tilbakeviser og at Garveriet no vert stengt. Nye aktørar er klar til å ta over drifta av utestaden og restauranten i Isdalstø.