Slutt for Garveriet

Garveriet Restaurant AS vert lagt ned, nye aktørar skal frå første april driva utestad og restaurant i Isdalstø.

- Då det ikkje har vore mogleg å koma fram til ein husleigeavtale med noverande eigar, ser eg meg nøydd til å innstilla drifta, seier Margunn Solsvik. Ho seier vidare at ho har jobba med å finna ei løysing på denne saka sidan ho overtok drifta i juni.

Solsvik seier til Nh at dei siste månedane har vore ei belasting.

- Eg føler eg har prøvd alt, no vil eg berre avslutta på ein verdig måte, seier ho. Solsvik takkar elles dei mange som har engasjert seg, ikkje minst via ei støttegruppe på Facebook.

- Det varmar i ei tung tid, seier ho.

Huseigar Ole Tom Ones forsikrar at det også framtida skal drivast utestad og restaurant i Isdalstø.

- Eg ønskjer ikkje å gå i detalj om leigeforholdet fram til i dag, anna enn at eg som huseigar har strekt meg svært langt i seks år på alle områder, særleg det økonomiske. Det einaste eg har kravd i seks år er at leigetakar betalar husleiga. No ønskjer eg å ha eit forhold til profesjonelle aktørar, seier Ones til Nh.

- Egil Arne Økland skal driva staden vidare, han har mellom anna erfaring som noverande innehavar av Torget Music Pub i Bergen.

Økland har også med seg ein partnar som skal stå for restaurant-biten.

Partnaren driv i dag 3 restaurantar i Bergen.

- Eg er godt nøgd med å ha fått til ein avtale med nye folk som kan driva staden, seier Ones.