Ønskjer debatt, ikkje forbod

Lindås-ordførar Astrid Aarhus Byrknes (Krf) ønskjer debatt om stripping som underhaldning og sex-fiksering i samfunnet.

Fredag kveld er det strippeshow med dansarar frå strippeklubben Dreams Showbar i Bergen på Garveriet i Isdalstø.

Onsdag melde NRK Hordaland at Lindås-ordføraren ønska at dei einskilde kommunane i Norge skulle ha moglegheita til å forby slike strippeshow som underhaldning.

Saka vart også omtalt på våre nettsider, www.nordhordland.no.

Overfor Nh opplyser no Lindås-ordføraren at oppslaget var tatt litt ut av samanhengen. Ho meiner likevel at temaet bør vera ope for debatt.

- Sex-fiksert samfunn

- Som eg sa til NRK og som ikkje er kome på trykk, så har eg aldri sagt eg vil ha noko forbod mot stripping. Men når eg fekk spørsmål om eg kunne tenkja meg å forby eit slikt arrangement så sa eg at kommunane i dag ikkje har heimel til det og at eg sjølv ikkje synes så mykje om denne type underhaldning, seier Aarhus Byrknes til Nh.

Ho meiner vidare at saka bør kunne drøftast sentralt med våre stortingsrepresentantar, noko som for ordføraren betyr å setja saka under debatt.

- Vidare sa eg til NRK Hordaland, og dette blei heller ikkje sett på trykk, at vi burde tatt debatten om det sex-fikserte samfunnet vårt, der grensene stadig blir tøya, og presset mange barn og unge føler når så mykje i dag omhandlar det å ha ein lekker kropp, seier ordføraren.

- Haldningsskapande arbeid

At debattemaet er reelt underbyggjer ho med at unge i dag har fri åtgang til verre ting enn eit strippeshow takka vera internett.

- Sjølv meiner eg at ein ikkje skal forby alt ein ikkje likar, men at vi bør kunne ha eit haldningsskapande arbeid og ei bevisstgjering omkring dette. Å setja temaet under debatt er noko heilt anna enn å forby, seier ho til Nh.