Truga betjening og politi

Politiet måtte onsdag kveld ta hand om ein godt rusa kar som både stal, slo og truga på ein av butikkane på Lindås senter.

Klokka 18.30 kom meldinga om at den rusa mannen var i ferd med å forsyna seg av tobakksvarer på ein av butikkane på Lindås senter.

Ein av dei tilsette i butikken prøvde å stoppa mannen, og fekk eit velretta slag i retur. Mannen truga også betjeninga før han forsvann frå staden med tjuvgodset.

- Politiet fann mannen ikkje lenge etter. Han oppførte seg då framleis trugande, også mot politiet. I tillegg til tjuvgodset hadde mannen også på seg ein uloveleg springkniv, men han truga aldri med denne, opplyser politioverbetjent Kjell Idar Vangberg ved Nordhordland lensmannskontor overfor Nh.

Mannen vart tatt med til arresten i Bergen. Torsdag vart han avhøyrt og seinare dimittert.

Mannen er ein gamal kjenning av politiet, men ikkje heimehøyrande i Nordhordland.

Også tirsdag måtte politiet ta hand om ein gamal kjenning, denne gongen ved biltilsynet i Knarvik.

Mannen hadde eitt gram hasj på seg då han vart tatt, og enda opp med ein tur i arresten og nokre tusenlappar i bot.

- Dette er også ein kar vi kjenner godt, men heller ikkje han er heimehøyrande i Nordhordland, seier Vangberg til Nh.