Fjorden stinkar og sjødyra døyr

Den siste tida har Spjelnessundet og området rundt vorte mørk grøn på farge og svært illeluktande.

Den dårlege lukta kjem frå den islagde Fjellangervågen, der det etter alt å døma har skjedd omveltingar av vassmassane under isen.

På same måte som i Lonselva i Knarvik (sjå eiga sak) frys det friske overflatevatnet og søkk til botn, berre for å pressa det dårlege botnvatnet høgare opp. Dette igjen fører til dårleg lukt og vatn som ikkje er leveleg.

- Etter ein lang periode med kaldt vêr er ikkje dette uvanleg, særleg når det er stilt, seier biologiprofessor Arne Johannessen ved Universitetet i Bergen til Nh.

Luktar forferdeleg

Sjøen i området er mørk grøn på farge og luktar alt anna enn godt.

Paul Sundsbø som bur like i nærleiken såg mykje døde sjøstjerner og i alle fall ein fisk som låg med buken i vêret då han var ute med båt tidlegare denne veka.

- Dessutan var det mykje småfisk som gjekk heilt i overflata og nærast snappa etter luft. Det ser ikkje bra ut i det heile tatt, og det luktar skikkeleg dårleg.

- Til og med oppe i byggefeltet kjenner vi lukta godt, og eg veit at når skulen skulle lufta her om dagen måtte dei berre gi opp fordi lukta var så stram, seier han til Nh.

Skal ta prøvar

Professor Johannessen kan fortelja at grønfargen nærast garantert skuldast ei algeoppbløming.

- Det er litt tidleg på året for oppbløming av algar, men det er nok det som har skjedd. Har du lite vind, klårvêr og sol som gir lokal oppvarming kan ein oppleva ei oppbløming av algar også no om vinteren, seier biologiprofessoren.

Johannessen og andre forskarar frå universitetet skal ut i Lindåsosane neste veke for å ta den fossile sildestammen i fjorden nærare i augesyn.

Då skal dei i same slengen ta nokre målingar i Fjellangervågen på oppdrag frå Lindås kommune.