Skapar nytt liv på fyret

Lene og Trond Ågotnes skal driva utleige av fyret, ny kafe på kaien, og skal også ha hand om turistinformasjonen i landsbyen vest i havet.

Pernillekafeen skal etter planen opna dørene i Bergsvik-huset like ved ferjekaien. I tillegg skal Lene og Trond Ågotnes driva utleige av Hellisøy fyr, og transport dit, pluss enkel servering når det blir arrangert konsertar og aktivitetar der.

Meir aktivitet

- No ser vi fram til at det skal bli meir fart og aktivitet på Fedje enn det har vore i det siste, seier Lene Ågotnes.

Pernillekafeen vil jobba aktivt for å opna fyret for fedjingar og gjestar gjennom lokale arrangement og opplevingar.

- Det blir mellom anna lagt opp til intimkonsertar og musikktreff med overnatting, seier Lene Ågotnes, som inviterer i nyoppussa fyr-bygningar med ti sengeplassar. Ho legg til at kven som helst kan bestilla overnatting på fyret.

Attraksjon

Målet er at fyret igjen skal verta ein attraksjon for både gjestar og lokalsamfunnet.

- Vertskapet har stor vilje til å prøva ut aktivitetar og tilbod på fyret. Alt blir gjort for å koma publikum i måte på ein positiv måte, oppsummerer ei kommunal arbeidsgruppe som er godt tilfreds med Pernillekafeen sitt konsept.

Turistinfo

Også Fedje-politikarane er tilfredse med driftsplanane, og har i første omgang godkjend ein to års leigeavtale for fyret.

Også planane for turistinformasjon blir tatt godt i mot.

- Vi er overbeviste om at dette vil vera ein fin tilvekst for å informera om viktige kultur- og reiselivsopplevingar i kommunen, seier arbeidsgruppa.

Lindebjerg først ut

Pernillekafeen har inngått eit samarbeid med arrangementselskapet Fedje Event Management, blant anna i samband med konsertar og andre tilskipingar på fyret. Opningsarrangementet på fyret blir 22.mai, med Dag Lindebjerg som trekkplaster.

Full fart neste år

- Vi kjem i gang i sommar, og satsar på endå større aktivitet på fyret til neste år. I mellomtida håpar vi at fleire tilbod og aktivitetar ser dagens lys på Fedje, seier Lene Ågotnes.