- Hugsar best diesellukta

Nesten tre år etter at lasteskipet Server grunnstøtte utanfor Hellisøy fyr på Fedje vart det nye og topp moderne oljeverdepotet på øya opna.

Fredag 12. januar 2007 skjedde det som ikkje skulle skje.

Det kypriotiske lasteskipet Server gjekk på grunn utanfor Fedje, og eit forsvinnande lite mellomlagringsdepot med nokre skarve oljelenser var alt fedjingane hadde å forsvara seg med i kampen mot oljesølet.

Oppryddingsjobben vart enorm, og sjødyr og fugl fekk unngjelda mest av alle.

Tirsdag 8. desember 2009, nesten tre år seinare, kunne endeleg det nye og topp moderne oljeverndepotet på Fedje opnast. No står eit depotmannskap på elleve, inkludert depotleiar Kjell Samnøy, klar på kort varsel dersom det skulle smella på ny.

- Galskap

Depotleiar Samnøy var mannen som leia arbeidet dei første timane etter at Server gjekk på grunn. Han fortel at han kom rett frå kranselag i fleirbrukshallen, og då han slo på TV 2-nyheitene heime såg han at eit skip hadde gått på grunn utanfor Fedje.

- Like etter ringte Kystverket og spurde om eg kunne kjøra ut og sjå korleis situasjonen var. Det eg hugsar best er diesellukta som var overalt, fortel Samnøy som på det tidspunktet var ansvarleg for mellomlagringsdepotet på øya.

- Utpå ettermiddagen lørdag ringte dei igjen og ville ha folk ut. Vi reiste av garde, og klarte å samla inn ein del olje. Så snudde vinden og alt rak utover igjen. I ettertid ser eg jo at det var galskap i det heile tatt å prøva på noko under dei vêrforholda som råda, fortel Samnøy.

Best stelt i landet

Beredskapsdirektøren i Kystverket, Johan Marius Ly, var ein fornøgd mann då det nye oljeverndepotet vart opna på Fedje i går ettermiddag.

- Ingen region i Norge er så godt stelt med oljevernutstyr som denne er no er, seier Ly som likevel ikkje kan lova at kommunen står rusta dersom ein supertankar går på.

- Det finst ikkje godt nok utstyr i verda dersom dei aller største båtane skulle grunnstøyta i dårleg nok vêr, seier han til Nh.

Det skapte ståk då oljeverndepotet på Fedje vart flytta til Florø for ein del år tilbake, og sidan den gongen har det vorte kjempa hardt for å få depotet tilbake.

I 2005 kom valløftet frå Stoltenberg-regjeringa om at depotet skulle gjenopnast i øy-kommunen, men ting gjekk for seint.

12. januar 2007 hadde Fedje kommune berre eit mellomlagringsdepot å hjelpa seg med då det small. Ein slik situasjon vil ikkje kommunen hamna i igjen.

- Reine føresteinar

- Alt utstyret her på Fedje er nytt, og vi er glade for at depotet er oppe og går igjen, utan at det har påverka depotet i Florø, seier beredskapsdirektør Ly.

Han understrekar samstundes at Kystverket er spesielt godt fornøgd med depotmannskapet på Fedje, der dei aller fleste har erfaring frå skikkeleg oljeryddingsarbeid.

Kjell Samnøy legg ikkje skjul på at også han er glad for at depotet endeleg er tilbake, men han passar seg vel for å kritisera nedlegginga.

- Den gongen var det nok ei riktig vurdering med nedlegging, men eg er glad for at regjeringa i etterkant har vald å oppretta eit nytt depot på Fedje, seier han.

Samnøy poengterar samstundes at han er glad det gjekk så bra som det faktisk gjorde i etterkant av den dramatiske Server-ulukka.

- I dag er det einaste synlege provet på at noko har skjedd at fjøresteinane er mykje reinare enn dei var før ulukka. Vi får vel nesten takka Kystverket for at dei la ned det gamle depotet. Hadde dei ikkje gjort det hadde vi aldri fått eit så flott og moderne depot som dette, seier han.

- Urettferdig

Fedje-ordførar Kristin Handeland kan fortelja at folket på Fedje oppfatta det som svært urettferdig då oljeverndepotet vart flytta til Florø, og ho legg ikkje skjul på at ho glad for at det nye depotet endeleg er på plass.

Ho takka også Ly for det gode samarbeidt kommunen og Kystverket har hatt så langt, og fortalde samstundes om store forhåpningar for framtida.

Avslutningsvis takka også ordføraren depotmannskapet for jobben dei no har tatt på seg, og poengterte at det viktigaste av alt var at dei tok vare på seg sjølv.

Handeland overrekte også Ly Erlend Spurkeland si bok om kongebesøket i Nordhordland.

- Denne kan de ha når eg masar på dykk. Så kan de i Kystverket sjå at eg i alle fall var blid ein dag i 2009, seier ho og ler.