Grå gang vart kunstgalleri

Barna i barnehagen på Kaland dansa av glede då dei torsdag kunne opna sitt eige kunstgalleri. Sjølvaste ordføraren var på plass for å klippa snora, deretter vanka det kanapear, etterfølgt av skikkeleg husmannskost til lunsj.

-Det er trongt her i gongen, men der det er hjarterom er det som kjent husrom, sa ein imponert ordførar. Han fekk sjå alt frå måleri til bilde barna har fotografert sjølv, skumle edderkoppar og utslitne skor. Og sjølvsagt hadde ordføraren med seg gåve.

Veronica Arnesen helsa frå Statoil Mongstad. Hjørnesteinsverksemda har avtale med kommunen om kjøp av plassar i barnehagen, og dei eldste barna får koma på besøk.

-De har laga så mykje fint, håpar vi kan få noko til å henga på våre veggar når de kjem, sa Arnesen. Til gjengjeld har ho lova eit glasskap til å stilla ut meir kunst i.

Tvillingar heldt snora

Tvillingane Marthe og Kristian Lid Løberg (5) fekk det ærefulle oppdraget med å halda snora ordføraren klippa. Dei fortel at dei ikkje hadde øvd på førehand, og at dei var litt nervøse.

-Ordføraren hadde på seg eit svært smykke, det var kjempefint, seier Marthe alvorleg.

Dei to har laga trå-edderkoppar, bilde og treklossar med måleri. Og så får dei måla bilde med sugerør.

-Vi bles på målinga gjennom sugerøret, det vert stilig, fortel dei.

Stolt oldemor

Ein del foreldre hadde takka ha til invitasjonen, sjølv om opninga gjekk mitt i beste arbeidstid. Men om mor og far ikkje kan, så stiller oldemor opp. Olaug Kjeilen frå Kjeilen har ikkje mindre enn tre av sine oldebarn i barnehagen på Kaland.

-Det er Anna, Jenny og Ina Marie, to av dei går på denne avdelinga. Kjekt å bli invitert, og så er dei jo så grådig flinke. Alltid kjekt å høyra barna syngja, seier Olaug ved lunsjbordet.