Vil støtta bedehus-bowling

I løpet av våren skal det vera mogleg å dra til med ein ”strike” i bedehuskjellaren i Leirvågen. Rådmannen vil løyva 100 000 kroner til bowlingbana eldsjelene på bedehuset er i ferd med å montera.

Då bedehuset for nokre år sidan vart bygt ut ved at ein på dugnad flytta ei gamal messe gitt av Statoil Mongstad, vart det og støypt kjellar under den nye delen. Her har det sidan vore jobba for å byggja ut eit ungdomstilbod.

No er to baner kjøpt brukt frå Sentrum Bowling i Bergen. I tillegg er det på plass bordtennis og biljard, og ein ønskjer å etablera eit lite utsal. Også denne gongen er alt gjort på dugnad, med støtte frå lokalt næringsliv.

Støtta bedehuset søkjer frå kommunen, er ikkje til sjølve banene, men til dataprogrammet som skal til for å driva dei. Bedehuset søkjer om 120 000, rådmannen finn at kommunen kan bidra med 100 000. Saka vert drøfta i kommunestyret 10. Februar.