Vil samla farleg avfall på Mongstad

Bedrifta Veolia Miljø Industri AS vil samla all aktiviteten med mottak og mellomlagring av oljehaldig avfall på Mongstad.

Verksemda har i dag anlegg både på Mongstad og Horsøy på Askøy.

I dag har Veolia løyve til mottak og mellomlagring av inntil 9500 kubikkmeter oljeavfall og oljehaldig vatn på Horsøy-anlegget.

I anlegget på Mongstad sør kan bedrifta ta i mot inntil 200 tonn oljehaldig avfall, inntil 150 tonn ilandført avfall frå oljeboring og produksjon, og inntil 30 tonn andre grupper farleg avfall.

Dersom fylkesmannen i Hordaland gir grønt lys for søknaden, vil aktivitetane både på Horsøy og Mongstad no bli samla i eitt anlegg på Mongstad.

Veolia Miljø Industri AS fekk løyve til drift på Mongstad sør hausten 2006. Alt i 2000 gav fylkesmannen konsesjon til Renovasjon Nord AS for å etablera eit anlegg for mottak og mellomlagring av farleg avfall same stad.

Etter ei tid vart dette anlegget overtatt av Børstad Transport, som igjen har overdrege anlegget til Norsk Gjenvinning og Veolia Miljø Industri AS.