Krise for Mongstad-vatn

Dersom industrien i Mongstad-området ikkje reduserer vassforbruket sitt, blir det nødvendig med ein stor reduksjonen i vassforsyninga frå Mongstadbase til oljeinstallasjonane i Nordsjøen.

Går på beredskapen laus

- Vi er nøydd til å gå til så drastiske tiltak ikkje minst for å oppretthalda nødvendig beredskap i området, understrekar einingsleiar Arne Eikefet i Lindås kommune.

Varsla politikarar og industri

Han har varsla Lindås-politikarane om at volumet av vatn som blir skipa ut til plattformene i Nordsjøen kan bli kraftig redusert dersom Mongstad-industrien ikkje reduserer sitt vassforbruk.

Vassverksetaten i Lindås kommune har gått ut med sterk oppmoding til bedriftene i Mongstad-området om å redusera forbruket av vatn. Arne Eikefet meiner det er fullt mogleg å gjennomføra ved å gjera eit krafttak mot frosttappinga.

Frosttapping

Arne Eikefet slår fast at det for tida er eit veldig stort vassforbruk i Mongstad-området, ikkje minst på grunn av frosttapping.

- Altfor mange lar vatnet renna for å sikra seg mot frost i installasjonar og rørsystem, seier Eikefet.

Gjennomsnittleg blir det dagleg frakta ut om lag 1000 kubikkmeter vatn om bord i supplybåtar frå Mongstadbase til oljeinstallasjonane i Nordsjøen – tilsvarande mengde som frå 100 vanlege tankbilar.

Nordsjø-forsyning kan bli halvert

Dersom det i ein periode skulle bli redusert utskiping av vatn frå Mongstadbase til plattformene, reknar Eikefet med at behovet for vatn kan dekkast inn over andre hamner.

Arne Eikefet vil ikkje i dag seia eksakt kor stor ein reduksjon i vassleveransane til Nordsjøen kan bli, men han utelukkar ikkje at det er nødvendig med ei halvering.

I dialog med industrien

Arne Eikefet er i dialog om redusert vassforbruk både med Statoil Mongstad, bedriftene på basen, og Austrheim kommune. Det er særleg situasjonen for reserve-vassverket i Rotavatn som skapar hovudbry. Dette vassverket står for 20 prosent av vassforbruket i Mongstad-området.

Urovekkande lågt

- Vatnet er så kraftig nedtappa at vassnivået er i ferd med å verta urovekkande lågt, seier Eikefet. Han meiner det skal vera fullt mogleg for industrien å redusera forbruket. - Det handlar om ein reduksjon på rundt ti prosent. I dag er forbruket unødvendig stort, fastslår han.

Frosttapping over alt

Vassforbruket i Lindås er svært høgt, og frosttapping pågår i alle delar av kommunen.

- Vi taklar situasjonen i resten av kommunen, men slit kraftig i Mongstad-området, seier Arne Eikefet.