Grønare lokalavis

Onsdag kunne redaktør Randi Bjørlo ta imot diplomet som provar at avisa har gjennomgått miljøsertifisering og blitt miljøfyrtårn.

- At lokalavisa vår har tatt denne jobben er prisverdig, og eit godt føredøme for andre. Eg opplever at både leiinga og dei tilsette tek utfordringane på alvor.

- Vi håpar sjølvsagt fleire lokale verksemder skal følgja etter, seier Lindås-ordførar Astrid Aarhus Byrknes som stod for overrekkinga.

”Mange bekkar små”

Frå før er fire verksemder i Lindås sertifisert, mellom dei det interkommunale renovasjonsselskapet NGIR.

-Det er eit godt stykke arbeid som no vert løna med miljøsertifisering. Lindås kommune har ein klimaplan som set mål for å redusera utsleppet, og då handlar det om at alle må ta eit tak for framtida vår.

- Her gjeldt verkeleg uttrykket om at ”mange bekkar små gjer ei stor å”, sa ordføraren.

Ulike bransjar har ulike krav for å oppnå status som miljøfyrtårn, Nh er sertifisert etter krava som gjeld for kontorverksemd. Etter tre år må verksemder som er miljøfyrtårn resertifiserast.

- Vi har ambisjonar om å setja nye mål og visa klar framgang i løpet av dei tre åra, seier redaktør Randi Bjørlo.

Fleire tek miljøspørsmål på alvor

Lindås kommune er einaste lokale kommune som har ein tilsett godkjent for å sertifisera verksemder.

Aslaug Aalen stadfestar at stadig fleire verksemder ønskjer å skaffa seg status som miljøfyrtårn, for å visa samarbeidspartnarar at dei tek miljøutfordringane på alvor.

- For berre eit par år sidan hadde vi eit par hundre verksemder landet over, no rundar vi 2500. Auken er formidabel, seier Aalen.