Knarviking i EU-parlamentet

Han ser livet i Europaparlamentet frå innsida, den utflytta Knarvik-mannen Frode Fjeldstad. Til dagleg jobbar han som informasjonsrådgjevar sentralt i Venstre.

- Det er viktig at også Norge følgjer med på kva som skjer i EU. Dei fleste avgjerdene her blir også gjeldande for Norge gjennom vårt medlemskap i EØS, seier Frode Fjeldstad.

Han søkte seg difor til ALDE-sekretæriatet for å tileigna seg meir kunnskap om EU.

- Vi må prøva å koma inn i forkant av beslutningane, men har ein tendens til å ta debattane to år etter at det meste er ferdigbehandla i EU. Då er det ofte for seint å få endra på det vi er misnøgde med, seier Fjeldstad.

Han synest det er heilt supert å få engasjera seg i politikk på heiltid. Sin daglege jobb som informasjonsrådgjevar inneber også redaktøransvar for medlemsavisa Liberal.

Før han i 2005 begynte i dagens jobb, var han generalsekretær i Unge Venstre i to år.

Politisk tent i gymnastida

Frode sitt politiske engasjement vart tent på ein skuledebatt på Lindås gymnas i 1995.

- Ein fyr frå Venstre meinte det var tøft å ta bussen. Det kan kanskje reisast tvil om, spesielt når ein kjem frå distriktet.

- Men poenget var enkelt; vi må satsa på betre og billegare kollektivtrafikk for å snu den globale oppvarminga. For meg har miljø alltid vore ei hovudårsak til å engasjera meg politisk, seier han.

Politisk rekneskap

I Brüssel er Fjeldstad stasjonert på pressekontoret i ALDE-sekretariatet, og arbeidar med å laga pressemeldinger og førebu pressekonferansar innanfor området fisk, energi og miljø (dei to første fekk han tildelt fordi han kjem frå Norge).

Frode Fjeldstad følgjer også med i EU sin nordområde-politikk, og han har fått i oppgåve å laga ein "politisk rekneskap" for ALDE-gruppa, som skal summera opp dei viktigaste sakene ALDE har jobba med dei siste fem åra.

Det skal brukast av kandidatar til Europa-parlamentet framfor valet til parlamentet i juni.

Aktiv Europapolitikk

I parlamentet registrerer Frode Fjeldstad ein aktiv Europapolitikk frå 27 medlemsland.

Parlamentsmedlemmene foreslår og vedtar endringar i lovforslag som Kommisjonen kjem med. Norge er ikkje til stades i den førebuande lovprosessen i Kommisjonen, i såkalla ekspertgrupper.

Vi går dermed glipp av sjansen til å påverka beslutningane her i parlamentet.

Blogger om EU

For at også folk her heime skal kunna følgja med, har Frode Fjellstad oppretta ein blogg, der han skriv om aktuelle avgjerder i EU. Den ligg oppdatert på framsida til venstre.no

Frode skal heim til Knarvik til jul.

- Det er alltid ein god stad å koma tilbake til, så får tida visa om eg flyttar tilbake til vestsida av fjella. Så langt trivst eg utruleg godt med å få lov til å driva med politikk på heiltid, seier han.