Byggestart til vinteren

I vinter startar arbeidet med bru over Brandangersundet, og brua skal etter planen stå ferdig neste vinter.

Prosjektleiar Aril Hanekamhaug er glad for at han endeleg kan sei at prosjektet har kome så langt.

Vi ventar på klarsignalet frå bruavdelinga, og signala vi har fått derfrå tyder på at godkjenninga av detaljprosjekteringa ikkje er langt unna.

Prosessen burde vore kome lengre, men vi er glad for at den har kome så langt, seier han til nh. Etter godkjenninga skal arbeidet ut på anbod, og på grunn av storleiken på prosjektet vert arbeidet lyst ut internasjonalt.

- Anbodprosessen tek to månader, og det kan fort gå ein månad til før bygginga tek til, seier Hanekamhaug.

Hanekamhaug fortel at grunnen til at prosessen har tatt så lang tid i alle hovudsak skuldas at det er eit heilt nytt konsept som skal byggast.

- Brua vert bygt ferdig på land, og vert løfta på plass med to flytekraner. Bæresystemet ligg over brua, i to stålrør som ligg over vegbana på kvar side av vegen, fortel Hanekamhaug.

Brua over Brandangersundet vert einfeltsveg, der to små bilar kan passera kvarandre, men ikkje to store bilar. Hovudspennet vert på 220 meter.