BKK Nett sin administrerande direktør Øivind Torkildsen måtte sjå langt etter støttespelarar i salen på Skogen Sletta under folkemøtet om høgspentlinja frå Mongstad til Kollsnes onsdag kveld.

Milliardkonsernet BKK hevdar framleis at det ikkje er samfunnsøkonomisk lønsamt nok å bruka pengar på å leggja linja i sjø og jordkabel heile vegen.

NVE viser til at det krevst ny praksis frå Stortinget før ein kan opna for meir kabling. Mot dei stod tre krystallklare ordførarar, og eit par hundre frammøtte som alle krev kabling.

Folkemøtet viser og at BKK, NVE og lokalbefolkninga ikkje er på linje med kva som eigentleg skal drøftast. BKK brukte si tid på å argumentera for kvifor regionen treng den nye leidninga, ikkje på å snakka om kvifor ingen vil ta på seg ekstrarekninga for kabling.

NVE på si side seier dei berre kan handsama det BKK faktisk har søkt om. Som ein av dei frammøtte sa, - Det vi vil snakka om er ikkje ein gong søkt om, korleis skal vi då koma ut av denne klemma!