Ny Sandberg-film

Øyvind Sandberg har laga film i 30 år, og i jubileumsåret har han fått støtte til nok eit prosjekt. Denne gongen er det folket i Nordhordland som skal i fokus.

Det nye filmprosjektet til Sandberg skal etter planen verta ein film om hans eige nærområde, det vil seia Nordhordland.

- Førebels har eg fått stønad til eit forprosjekt, og håpet er at det skal enda opp i ein film, seier Sandberg, som også er aktuell i desse dagar med eigen DVD som inneheld fem av hans tidlegare produksjonar.

Sandberg ser for seg at den nye filmen skal omhandla folk som framleis livnærar seg på same måte som dei gjorde for 40-50 år sidan.

- Fanga dei før Mongstad

- Eg har ikkje så mange namn enno, men eg har tenkt meg fleire tema. No er eg i gang med researchsarbeidet, og det vil nok halda fram til rundt juletider. Så er planen å få laga ein pilot til filmen, slik at dei som sit på pengane vert interesserte, seier Sandberg til nh.

Filmskaparen er på jakt etter alt frå geitebønder og fiskarar til gamalt handverk. Han ønskjer å festa desse gamle levevisa til filmen før det er for seint.

- Vi må prøva å fanga dette før alle jobbar på Mongstad. Dette er utdøyande tradisjonar som eg ønskjer at vi skal hugsa, seier han.

Jubileums-DVD

Øyvind Sandberg filma sin første film i 1976. Den handla om selfangst i Vestisen utanfor Grønland, og vart gitt ut i 1978. Dette er i år 30 år sidan, og filmskaparen feirar såleis eit aldri så lite jubileum i år.

I samband med jubileet, lanserar Norsk Filminstitutt ein eigen DVD med fem av Sandberg sine tidlegare produksjonar.

På DVD-en får ein kjennskap til ålefiskarane på Bømlo, laksefiskarane i Osterfjorden og Elmer som dreiv blomsterbåten i Masfjorden. I tillegg får vi møta ein motorfrelst kyrkjetenar og bøndene som budde på dei bratte gardsbruka i Vik i Sogn.

Tar vare på det gamle

Hovudtema som går igjen hjå Sandberg er dei spesielle historiene om folk som driv med noko utanom det vanlege. Hans aller største suksess så langt er ”Kabal i Hjerter”, som vart ein slager både her til lands og i utlandet.

- Det nye prosjektet følgjer mange av dei gamle spora, etter for eksempel Ålefiskarane og Laksefiskarene. Eg synest det er viktig å ta vare på det gamle, seier Sandeberg.

Øyvind Sandberg sine filmar:

¿ En reise til Ishavet

¿ Laksefiskerne

¿ Ålefiskerne

¿ Elmer og blomsterbåten

¿ Konsert for tre hester i to takter

¿ Å seile sin egen sjø

¿ Kabal i hjerter

I tillegg har filmskaparen laga fleire kortare barnefilmar.