Tjuvfiske trugar sjøauren i Radøy

- Lovverket tilseier at det ikkje er lov å fiska nærare ei elvemunning enn 100 meter. Og det er slett ikkje lov å fiska med garn. Men det er det tydelegvis fleire som ikkje bryr seg om, seier Osvald Dragøy, leiar i Myking- og Hauglandsvassdraget fiskelag til nh.

Dragøy er ein av fleire grunneigarar som har sett seg grundig lei på tjuvfisket i elva Bøåna, som tiltross for at ho er lita, er svært produktiv.

- Det er folk som set garn og ruser i utløpet, og ruser er også observert i sjølve elva. Dette er utruleg skadeleg for sjøaurebestanden. Vi ønskjer at ungane skal få moglegheita til å stå med fisketroa langs elva også i framtida, men dersom det held fram slik, vert det ikkje noko meir å fiska etter, seier Dragøy.

- Stort problem

I september for to år sidan skreiv nh om ein politiaksjon på Seim, der det vart gjort beslag av fleire ulovlege garn. Miljøvernleiar Asbjørn Toft i Radøy kommune stadfestar at tjuvfiske er eit problem også på den grøne øya, og då særleg i Rikstadvågen.

- Vi får inn ein del rapportar på ulovleg garnsetjing, mest om hausten når fisken går opp for å gyta. Vi veit at det er fleire personar som held på med dette fisket, og Statens Naturoppsyn har meldt frå om at dei kjem til å ta saka alvorleg, seier Toft til nh.

Sjøauren byrjar å gå opp i småbekkane for å gyta allereie i juni-juli, men det er helst i september og oktober, når mørket kjem tidleg, at tjuvfiskarane er på ferde.

- God og lovleg måte

Både Toft og Dragøy har svært lite til overs for det ulovlege fisket. No håpar dei tjuvfiskarane tar til fornuft, og held seg til regelverket som gjeld for fiske i vassdraget.

- Vi kan ikkje berre hausta på fiskestammen. Vi grunneigarar arbeidar for at naturen skal brukast på ein god og lovleg måte, som ikkje vert døden for fiskebestanden. Garnfisket i gyteperioden øydelegg enormt, seier Dragøy.

Toft poengterer at tjuvfiskarane ikkje skal føla seg for trygge når dei driv lyssky aktivitet.

- Politiet veit om saka, og det er mange i området som følgjer godt med, og rapporterer dersom dei ser noko ulovleg, seier han til nh.

Farleg veg til gytegropene

Sjøauren som går opp i Bøåna møter mange farar på veg mot gytegropene. Elva, som bind både Hallandsvatnet, Mykingvatnet og Hauglandsvatnet saman, er nokså lang, men ikkje spesielt brei eller djup.

Alle dei tre vatna har store bestandar av rovfisken gjedde, så å føra slekta vidare er ikkje berre enkelt for sjøauren i vassdraget, som i følgje ein rapport frå 2005 er eitt av dei tre mest produktive vassdraga på Radøy.

Fangstpremie på gjedde

Grunneigarlaget ser gjerne at folk fiskar i vassdraget, så lenge reglane vert følgde.

- Med fiskekort kan du fiska heile året i alle dei tre vatna. Du kan også fiska med garn etter gjedde heile året, seier Dragøy.

Så interessert i å bevara aurestammen er grunneigarane, at dei har lyst ut fangstpremie på all gjedde fanga i Hauglandsvatnet og Mykingvatnet.

- Fiskaren får ti kroner per gjedde fanga i desse vatna. Fiskaren som fangar den største gjedda kvar år, vil få 500 kroner for jobben, forklarar Dragøy vidare.