Har begeistra eldre i 23 år

Randi Sævdal har vore aktivitør i ei årrekkje. No skal ho pensjonerast, og det skal feirast med Begeistrringen.

- Det er sagt om deg at du er lun, omsorgsfull og at du tar vare på alle, seier Laila Pletten, dagleg leiar ved Frivilligsentralen i Manger.

Borda er pynta med friske blomstrar, lys, og fine serviettar. Rundt bordet sit mange som vil vera med på Randi Sævdal sin siste dag på Velferdssenteret.

Aktiviserar

Det var eigentleg 96-åringen Mally Kjeseth som skulle vera med Laila Pletten å dela ut Begeistringen i dag. Ho er den som har vore lengst på avdelinga. Men Mally vart dessverre sjuk, så Laila måtte klara seg sjølv.

Brukarane av dagavdelinga bur heime, og vert henta nokre dagar i veka, til sosialt samvær og aktivitetar. Det er her Randi kjem inn.

- Du er god å lytta, og svært kunnskapsrik. Du er god på lokal historie og geografi, og når du fortel, lyttar alle, seier Laila.

- Mally har uttalt at du er som ei mor, legg Laila til, og smiler.

Begeistringen

Randi Sævdal byrja først som assistent for aktivitøren på sjukeheimen, men frå 1993 sto ho på eigne bein. Saman med Frivilligsentralen har ho arbeidd for å gje eit godt tilbod. Men hovudpersonen sjølv synest ikkje ho har gjort noko stort.

- Dette var høgst overraskande, og ikkje så fortent som ein vil ha det til, seier Randi, med Begeistringen godt plassert på blusen.

Randi fortel om tida si som aktivitør, og korleis ho utvikla seg gjennom arbeidet.

- Eg fann ut at eg ikkje døydde av å stå å på eigne bein, ler ho.

Og som alltid, skal vi tru Laila, så sit alle og høyrer godt etter når Randi fortel.

- Og dette er takka vera dåke som er så tålmodige med meg, seier Randi og ser på dei som sit rundt borda.

Pensjonist

Det vankar fleire gåver til Randi i dag. No startar pensjonisttilværet, og fleire trur ho vil få det travelt likevel. Dei to eldre damene som sit ved bordet til Randi rosar ho, og ynskjer lukka til med tida som pensjonist.

- Det vert ikkje det same utan deg, meiner dei.

- Det kjem nok nokon som er bra, trøstar Randi, som ikkje ser ut til å vera heilt førebudd på at den siste dagen hennar skulle markerast på denne måten.

- Eg tenkte eg skulle skli litt sånn anonymt under linoleumen eg, flirer Randi.

- Takk for tida. Eg kjem til å hugsa dåke, og eg har gode minne, seier Randi Sævdal, før ho går inn i ein ny epoke i livet, som pensjonist.