Vill begeistring i "Anna-klubben"

Tradisjonen tru er det klubbkveld i gymsalen på Loas denne første tirsdagen i månaden – sjølv om det er 1. mai. Borti eine hjørnet står ho som skal bli kveldens hovudperson, Anna Leivestad, i full sving med å selja hot dog, brus, snop og chips, i lag med heimebakte kaker og kaffi. Ho har ikkje peiling på kva som skal skje, før ho vert ropt fram på golvet.

- Dette er ein kjempeklubb som vi er veldig glade for å ha. Difor vil vi gje deg ein BegeistRing, seier Hildegunn Totland - til høglydte bifall frå resten av gjengen. Det er tydeleg at ho Anna med sitt rolege, blide vesen er veldig godt likt av klubb-medlemmane.

Kjekke klubbkveldar

I 17 år har Anna Leivestad arrangert denne tirsdagsklubben – som populært vert kalla ”Anna-klubben” – ikkje ubegrunna. I tillegg til den sosiale kosen, er bingo, levande musikk og dans, faste innslag på klubbkveldane. Og om sommaren vert gjerne heile gjengen invitert på grillparty i hagen hennar på Leivestad.

- Ho har alltid tid til oss, og fortener all mogleg ros og takksemd, er den samstemte helsinga frå både brukarar, støttekontaktar og tilsette.

Frå ein trufast flokk brukarar får Anna roser – ei frå kvar – og eit kort der det står ”Me ønskjer deg glede og fred, og dyp tilfredshet og alltid kjærlighet. Takk for at du er så snill og god mot oss”.

Deler æra

- Tusen hjarteleg takk, seier Anna og klemmar kvar og ein av dei. Til nh sin utsende er ho snar med å presisera at det er Lindås og Masfjorden lag av NFPU som står bak klubben.

Og ho vil gjerne dela begeistringen med heile laget.

Men brukarane står på sitt; Det er ho Anna som er sjølve Anna-klubben. Ho skal ha æra og takk. Basta!